Recientemente e linguista y Papiamentista, Ramon Todd Dandaré a asisti na e di 20 conferencia di Eastern Caribbean Island Cultures, hunto cu otro oradornan di Aruba y den nos region Caribense na Universidad di Corsou.

E conferencia aki ‘Islands In Between’, ta uno anual y generalmente e ta wordo celebra na november den diferente isla di nos region. E ta enfoca mas tanto riba e islanan di Caribe oriental of Easters Caribbean. E ta un conferencia na nivel academico cu ta wordo co-organisa pa Universidad di Puerto Rico na Río Piedras, Universidad di Corsou, University of the West Indies na Cave Hill, Barbados, University of the Virgin Islands y Virgin Islands Caribbean Cultural Center. E ta conta cu presencia no solamente di e islanan aki, sino tambe di Merca, Surnam, Hulanda, Alemania, etc..

Historia di ortografia na Aruba
Sr. Todd Dandare a presenta un charla riba historia di ortografia na Aruba cu ainda e linguista no a presenta na Aruba.

E no ta descarta e posibilidad di presenta su charla riba nos isla, ya cu e ta considera interesante pa discuti con den realidad e ortografia di Papiamento na Aruba a nace y tambe su desaroyo. E ta haya relevante pa destaca e tipo di conferencia aki cu un contenido di charlanan interesante cu nos hendenan di Aruba por a saca e miho probecho di dje. Tin biaha nos no ta na haltura di conferencia cu tin den nos islanan ruman y den nos region. Pero alcontrario tambe, ya cu otro islanan no sa cu nos ta organisa conferencia na Aruba. “Nos mester informa otro mas”, e di.

Den cierto sentido e ta haya cu e conferencia aki a bira un bon escenario pa promove e cumbre tocante nos lenga materno den cuadro di Aña di Papiamento. Sinembargo e cumbre cu nos ta bay tin riba nos isla na luna di september venidero ta bay tocante Papiamento so como lenga. Mientras cu e conferencia ‘Islands In Between’, tabata un conferencia general cu un agenda amplio di diferente disciplina manera temanan linguistico, cinematografia, genero, literatura, etc..

Den e cumbre aki, linguista Todd Dandaré tambe ta bay participa y e lo papia riba Papiamento como lenga crioyo y su desaroyo compara cu otro lenganan crioyo. E ta preparando tambe pa un charla cu pronto e lo bay duna na isla di San Andres (Colombia).

Representacion di Aruba
Na Aruba tabatin un grupo di orado di caliber cu a participa encabesa pa nos minister di enseñansa Rudy Lampe (RED).

Di e delegacion aki nos por menciona entre nan academiconan manera Luc Alofs, Jenny Lozano, Mieke de Droog, Ryçond R. Santos do Nascimento y Carlos Rodríguez, nan tur di Universidad di Aruba (UA). Tambe Gregory Richardson di Instituto Pedagogico Arubano (IPA). Sin laga afo tabata presente Joyce Pereira y Lidia Emerencia, entre otronan.

Tur e presentacionnan tabata interesante, pero e charla cu a hala basta atencion tabata esun di Luc Alofs (Universidad de Aruba) riba mitonan colonial y historia di Caribe. Den su lectura e antropologo y historiado ‘ta kibra cierto mito di personahenan historico cu ta wordo pinta como bon persona, pero ta resulta cu no tabata asina’. Tambe e investigado aki ta referi na e colonisacion di e islanan conoci como ABC (Curaçao, Aruba y Bonaire) durante e periodo 1500-1634. E ta un docente di UA asocia cu e proyecto NWO/KITLV-project ‘Travelling Caribbean Heritage’.

Aña pasa, Puerto Rico tabata e isla anfitrion di e conferencia aki, pero a resulta cu na september, un luna prome cu e conferencia lo mester a tuma luga, tabatin presencia di horcan Maria cu a ocasiona basta daño den islanan manera St. Maarten y tambe Puerto Rico, na 2017. P’esey e conferencia a wordo posponi y el a tuma luga na Corsou na final di luna di maart. Eventualmente luna di november venidero lo tin otro conferencia den otro isla. E conferencia aki a yega tuma luga na Aruba casi cuater aña pasa na IPA.