“Nos djis no tabata kier pa gobierno otorga ningun tereno den area di naturalesa mas prome cu eleccion, ” presidente di Aruba Birdlife Foundation (ABC) Greg Peterson a comenta na Bon Dia relaciona cu caso recien cu nan a perde contra gobierno.
Pa lesa e Vonnis completo di e caso, click aki> Vonnis-KG-ABC-Land-9.8.2017 (1)
Algun siman atras nos a publica tocante e caso entama door di E.de Veer Chain Theatres y MetaCorp contra gobierno pa construi un cinema/shopping mall nobo den area di Palm Beach. Hues a rechasa e demanda aki den un sentencia riba 5 di juli 2017. Den e proceso ey ta Cinemas a haci e intento pa purba forsa gobierno pa duna nan e licensia mas rapido posibel pa nan por sigui cu e proyecto.
ABC a uni cu gobierno contra Cinemas den e caso ey. Despues di esaki, ABC a bay na haci un peticion na hues pa gobierno no otorga ningun tereno den areanan ‘wetland’ te ora cu henter e asunto di ahustacion di R.O.P. (Ruimtelijk Ontwikkelingsplan) ta soluciona. Peterson: “Nos a haci peticion pa no otorga e tipo di terenonan aki te ora drecha R.O.P. of te despues di eleccion. Pasobra nos tabata tin miedo cu eleccion ta na caminda y Santa Clause ta cana rond partiendo regalo dimas.” ABC tambe a haci peticion pa gobierno finalisa e ‘landsbesluit’ pa e 16 areanan di naturalesa cu mester bay bao proteccion.
Mocion di desconfiansa
Gobierno no a caba di midi e 16 areanan aki ainda. Pues hues no por dicidi riba algo cu ainda ta incompleto. Hues a conseha ABC pa nan bay parlamento pa wak si parlamento no por bin cu un tipo di mocion di desconfiansa contra minister di infrastructura. “Pasobra e ta trabao di parlamento pa segura cu e minister ta actuando corecto. Aworaki nos tin cu purba di wak si nos por logra via un otro angulo.”
Bataya pa naturalesa
E fundacion aki desde aña pasa ta aparentemente den un bataya mas grandi pa salbaguardia nos naturalesa. Aña pasa nan a perde un caso contra compania PGM Condobuilders N.V. unda cu e compania a haya tereno erfpacht como tambe e bouwvergunning fin di november 2015. Esaki tabata relaciona cu proyecto Azure Condominiums na Bubali. Riba 13 April 2016 un total di 8.700.000,- dollar a wordo inverti dor di PGM pa construi e proyecto aki como tambe contractnan di 4.000.000,- dollar cu entre otro subcontractors y suministradornan. Un di e abogadonan a bisa e tempo ey cu ”bubali ta seco y e no ta un luga importante pa parha mas.” Segun sr. Peterson a splica Bon Dia aña pasa, ABC ta den conexion cu organisacionnan grandi internacional pa mustra nan cu na Aruba mes tin asina hopi animo pa gobierno bay protega tur e 16 areanan cu a wordo vota unanimamente den parlamento na 2013. ”Vogel Bescherming Nederland ta sostene nos tambe caba cual ta un di e organisacionnan di mas grandi na Hulanda pa cu persevacion y conservacion di naturalesa.” Vogel Bescherming ta e partner oficial di Birdlife International cual ta e organisacion mas grandi di mundo.
