Aruba Birdlife Conservation (ABC) a indica cu lo no apela e veredictonan den e casonan di Bubali manera recien esun contra e proyecto Azur condominium na Bubali Plas. Sinembargo nan ta sigui e caminda legal pa para construccion den e area.
E fundacion a cuminsa cu casonan pa para e proyectonan di construccion den e area cu ta cay den e zona berde unda mester proteha naturalesa. Den e ultimo caso contra Azur e hues a mustra bon cla cu e no kier uza e instrumento di kort geding (caso sumario) pa cumpli cu e demandanan di ABC pa para e proyecto, asina e fundacion ta splica. Awor e fundacion ta convenci cu por bringa exitosamente cualkier ponencia den e casonan. Sinembargo lo no uza e procedura di caso sumario sinembargo e bodemprocedure (caso profundo) cu ta tuma mas tempo ( mas o menos 1 aña) pa hues yega na un veredicto.
Ademas e fundacion a cuminsa un peticion, manera Bon Dia Aruba a trece varios biaha. Awor nan a colecta mas cu 8000 firma pa asina para e destruccion di 16 area di naturalesa importante. Un area ta concerni esun cu e mangelnan na Savaneta. E fundacion ta bisa cu nan no ta na fabor di e proyecto di hotel na Isla di Oro den e area ki, un proyecto di inversionista Venezolano. ABC a informa gobierno oficialmente di nan punto di bista na april hunto cu otro NGO nan cu tambe ta contra e proyecto aki.
