Organisacion ambiental Aruba Birdlife Conservation (ABC) lo ta bayendo corte atrobe pronto pa preveni destruccion di area di wetland na Bubali.  Esaki nan a anuncia riba nan pagina di Facebook algun dia pasa. Bon Dia Aruba a tuma contacto cu abogado di ABC, Geert Rep pa un elaboracion riba e asunto, igualmente cu Eduardo de Veer riba nan banda di medaya como desaroyado.

E caso na caminda ta en conexion cu un proyecto di The Cinemas cu ta planea pa construi un cinema nobo den area di Palm Beach/Southbeach.  ABC ta haya cu permiso pa construi na e localidad aki, cual ta wetland, no ta den harmonia cu e ROP(Ruimtelijk Ontwikkelings Plan). “Aruba no por sigui pasa den mas destruccion di nos areanan di naturalesa. Nos dedenan ta crusa, nos ta haci esaki pa e muchanan,” tabata comentario di ABC siman pasa.

Manera ta conoci, e caso a inicia den luna di juni por medio di The Cinemas (de Veer Theatres) contra pais Aruba. ABC a forma parti di e caso aki e tempo ey. Hues no a duna The Cinemas rason anto awor de Veer Theatres a haci apelacion na e decision ey. Por medio di ABC, abogado Geert Rep a subi na defensa siman pasa na e apelacion aki. Awor ta wardando pa corte stipula fecha pa e caso cual lo por bira rond december of januari.

Sr. Rep ta splica Bon Dia cu e no sa completamente kico e posicion di minister di Infrastructura ta den henter e situacion aki. “Nos a protesta riba e hecho cu de Veer kier un edificio den wetland. Anto esey ta un posicion hopi cla. E minister sin embargo nos no sa kico el a haci tras di porta cera. Nos no sa kico lo pasa eynan. Mi por djis spera cu e no ta bay aproba e plannan di construccion di de Veer. Den mi opinion, den e prome plan original di construccion a pidi pa un edificio di dos piso. Pero ami ta wak un plan di construccion pa un edificio di tres piso. Pues ami ta bisa esaki no ta aceptabel pero esey ta mi opinion,” e abogado ta splica Bon Dia.

De Veer Theatres: ‘Nos a cumpli cu tur rekisito’
Manera cu a wordo bisa den corte algun luna pasa,  E. de Veer Chain Theatres y MetaCorp a haya un derecho di opcion y a cumpli cu tur condicionnan di esaki. Locual falta awo ta pa otorga e erfpacht.  Sr. de Veer ta pensa cu pa via cu tabata tin eleccion kisas esey a trece algun tardansa den e proceso pa finalisa tur cos, pero no ta sigur si ta asina.

“Nos a pidi un sitio y departamento di infrastructura a indica cu esey ta e miho sitio.  Ministerraad a tuma un decision cu e ta cuadra cu e doelstelling, e resto tur ta parti di e caso huridico cu a bay corte. Kiermen henter e proceso ey a culmina cu un derecho di opcion riba e erfpacht ey.  Solamente faltando pa cumpli cu un par rekisito di cual tur a wordo cumpli cu ne,” sr. de Veer ta splica Bon Dia Aruba.


Cinema nobo
E tereno (wetland) den cuestion ta situa patras di South Beach/Hooters/Benihana unda cu tin un proyecto di mall/cinema den planificacion pa construccion. Den corte a bini pa dilanti cu gobierno a duna e compania e opcion pa haya e tereno na luna di januari 2017.

Esaki ta un proyecto cu aparentemente lo mester keda cla despues di 52 siman di construccion. E ta un proyecto cu lo consisti tambe di inversion grandi di un asina yama ‘sistema IMAX’.  E compania local no kier perde e contract exclusivo aki cu IMAX (cual aparentemente lo brinda exclusividad na Aruba den ramo di Cinema) y sufri consecuencia financiero pa via di tardansa cu procedura di otorga tereno como erfpacht. Abogado representando gobierno, Celina Wever,  a enfatisa algun luna pasa den corte cu e compania mester tin pasenshi riba otorgamento di derecho di erfpacht, anto a pidi hues pa rechasa e demanda aki y laga e proceso cana su caminda.  Rapport di DOW mes a pidi pa haci mas investigacion riba e tereno prome cu construi.

Area protegi
Greg Peterson di ABC a declara na Bon Dia algun luna atras cu  e ta haya cu tin algun cos cu ta poco preocupante den henter e asunto aki. Prome Minister demisionario Mike Eman a publicamente anuncia den november/december di aña pasa cu lo asigna 16 area di naturalesa cu lo wordo protegi, y segun sr. Peterson e area den cuestion ta un di e areanan aki tambe.

Sr, Peterson ta bisa, “e cos aki a wordo ripiti asina hopi biaha y toch den januari di e aña aki un hende a bay y duna un opcion pa haya e tereno aki. Segun e ROP. esaki ta un area cu no ta designa pa e tipo di cos aki.”  El a sigui bisa nos tambe cu DOW a conseha contra e proyecto aki.

E abogado di ABC ta enfatisa cu e tereno aki ta consisti di puro lodo y ta bira un desaster ora cu awasero ta cay, cual tambe ta  hopi cuestionabel y algo pa pone atencion na dje segun sr. Peterson. Directie Natuur en Milieu no a haya un oportunidad pa skirbi un rapport riba esaki ainda – algun luna pasa tampoco – cual ta hopi importante pa nan haci, segun sr. Peterson a splica nos.

Actualmente redaccion di Bon Dia no ta na altura si e rapport aki a keda cla.  Sr. Peterson a comenta: “Nan no a envolvi e departamento aki cu semper mester ta envolvi den e tipo di cosnan asina.  Esaki ta un area cu Princes Beatrix mes tambe a bin apoya pa proteccion unda cu tin 168 especie di parha registra.”