Mediante diferente post publica riba red social Facebook, e NGO local Aruba Birdlife Conservation ta bin publicando un serie di preocupacion cu nan tin pa loke ta trata conservacion di medio ambiente na Aruba.

Mediante un post ta resalta e modelo di turismo cu Aruba ta hibando na e momentonan aki, cu a bira algo masha grandi mes, caminda comunidad ta sirbi “un mashin industrial.”

Den un post reciente, denomina ‘Ekilibrio Perdi den e Paraiso, E Modelo Turistico di Aruba’, ta describi cu Aruba, un isla den Caribe, ta presenta un contradiccion cu ta toca e fibra sensibel tanto di ecologista como di economistanan. Conoci pa su beachnan impresionante y su cultura, Aruba tambe tin un tesoro menos conoci pero igual di significativo: su especie di parhanan unico. E Shoco cu a ser declara simbolo nacional na 2012 y e Prikichi declara como parha nacional di Aruba na 2017.

E sub-especie aki endemico awor ta emblema di un crisis urgente di conservacion. E situacion precario di e Shoco y e Prikichi ta un recordatorio duro di e retonan ambiental mas amplio cu Aruba ta enfrenta, intervencion humano cu antes tabata leu a bira indispensabel pa nan superviviencia. Programanan di cria no solamente ta beneficioso, sino necesario pa evita nan extincion.

Ademas, e organisacion ta trece dilanti cu historia di industria turistico na Aruba, e piedra angular di economia, ta uni cu e historia ecologico aki, inicialmente creado como un bendicion pa e poblacion local. “Turismo a bira un monster, unda e papelnan a cambia: awor ta parce cu hende ta existi pa sirbi e industria.” E giro aki di usa comunidad pa sirbi “un mashin industrial” ta plantia diferente punto tocante sostenibilidad y gestion etico, for di un punto di bista critico, e cambio di strategia turistico di Aruba, cu a pasa di calidad pa cantidad, y introduccion di turismo di aventura a crea varios debate tocante su consecuencianan. E transicion aki por ser percibi solamente como un disminucion di calidad di experiencia tanto pa turistanan como pa e poblacion local, tambe como un menasa importante pa e entorno natural di e isla.

Sector turismo di aventura, cu su marcanan fuerte, ta acusa di empeora e mesun problemanan cu nan ta pretende di scapa.

Den e contexto aki, e organisacion ambiental ta señala cu Aruba ta den un dilema. Trato pa nos parhanan endemico, Shoco y Prikichi, ta sistomatico di algo mas amplio: ekilibrio entre desaroyo economico y conservacion di naturalesa. Durante añanan, e ekilibrio aki a inclina peligrosamente na esun prome, sin tene na cuenta e consecuencianan a largo plaso. Mientras Aruba ta enfrenta esaki, e destino di su parhanan ta den riesgo. E caminda pa sigui ta yen complehidad, pero e necesidad di cambio ta evidente.

Historia di Shoco y Prikichi no ta trata solamente di conservacion, sino di e tipo di nacion cu Aruba ta aspira di ta. Ta un yamada pa re-pensa, re-evalua y tal bes re-imagina un futuro den cual prosperidad economico y proteccion di medio ambiente no lo exclui mutuamente, sino ta partinan integrante di un sostenibilidad etico.

Continuando cu e tema di Prikichinan, no ta un secreto cu na Aruba pa varios aña caba ta existi un bestia depredador cu hopi hende ta kere cu ta e causante di extinsion di prikichinan, cu ta e boa. Sinembargo, Aruba Birdlife Conservation ta splica cu esey no ta e unico factor cu por atribui na e disminucion di e prikichinan, sino tambe mester considera destruccion di nan habitat, manera e zona situa patras di Lighthouse, seriamente afecta pa uso di ATV’s y UTV’s a perhudica e flora y fauna local. Un ehemplo di esaki ta e destruccion of abandono di 13 neishi di shoco cu tabata rod di e luga aki, loke ta indica un impacto negativo di casi 100% debi na mala gestion di turismo y actividadnan di turismo di aventura, manera nan ta sigura.

Mester destaca cu Patrishi, un otro especie di parha autoctono, tambe a desaparece for di e luga.

Un otro factor den e disminucion di prikichinan ta e especienan invasor, manera pushi, cacho, djaca, boa y cabrito cu ta afecta di forma significativo e fauna, incluyendo e prikichi. Cabritonan ta altera e paisahe afectando palonan na unda e prikichinan ta para, come y cria su prikichinan chikito. Pushi y boa ta depredador mientras cu djaca ta invadi e neishinan y ta come e webo y crianan.

Ademas, e enfasis excesivo di cantidad riba calidad den turismo a conduci na un turismo excesivo, e perdida di habitat, loke a pone e situacion bira mas pio ainda.

E tendencia preocupante di captura e prikichi pa cera nan den haula cu fin domestico a desestabilisa ainda mas su poblacion.

Conhuntamente, e problemanan aki ta refleha e naturalesa no sostenibel di e modelo turistico actual, e politica floho pa bestia di compania, mal gestion di habitat y uso indiscrimina di herbicida, ta conclui cu e disminucion di poblacion di prikichi ta pa e factornan aki.

E construccion di hotelnan y e anuncio di un posibel yegada di un crucero cu aproximadamente 7.600 turista na Aruba tambe a hala atencion di Aruba Birdlife Conservation, na unda den un publicacion nan a logra centenares di reaccion pa loke ta trata turismo responsabel. Den comentarionan, algun turista a laga nan opinion manera “ora mi a biaha Aruba 2 aña pasa, dia e hendenan di crucero a yega Eagle Beach tabata horibel. Nan a laga hopi sushi atras maske tabatin bakinan pa sushi, otro hende mester a haci e beach limpi, e yegada di hopi hende na e beach tin su impacto.”

Sinembargo, otro ciudadano y turista si ta di acuerdo cu e yegada di crucero y no kier mira un isla manera tabata den pandemia, cu a cera fronteranan debi na pandemia di Covid-19.