Aruba Birdlife Conservation ta adverti riba practica di “rock stacking” cu a yega Baby Beach

Mediante un publicacion ariba nan pagina di Facebook, e organisacion Aruba Birdlife Conservation a bati alarma pa e fenomeno di “rock stacking” cu a yega e area di Baby Beach y alabes ta adverti tocante e peliger cu esaki por tin, specialmente pa mucha.

Manera ta conoci “rock stacking” no ta ilegal na Aruba, pero su efecto pa naturalesa ta perhudicial ya cu e piedranan ta forma parti di habitat natural di especienan di bestianan chikito cu ta biba den naturalesa di Aruba. Algun experto ta bisa cu “rock stacking” por hasta hiba cierto especie pa extincion.

Na Aruba, hopi di e “rock stacking” ta pasa tambe cerca di Parke Nacional Arikok. Aunke e practica di e actividad aki no ta ilegal na Aruba, talbes ta tempo pa autoridadnan di parke pone reglanan estricto pa cu e actividad aki.

Turistanan ta pensa cu e significado tras di e actividad aki ta cu nan por haci un deseo, pero nan no ta realisa e impacto negativo di esaki.

E publicacion di Aruba Birdlife Conservation a ricibi hopi reaccion di tanto turista como localnan cu ta condena e actividad aki.

“Ainda? Ami tur biaha ta bay kibra nan tira nan abao- y hasta turista mes a join mi yuda tira nan abou! Tur Arubiano haci mescos! Te dia nan siña! Mentalidad di turista nan aki ta bisa hopi cu nan tin e spirito di nan tatanan cu a Colonisa- y no ta importa nan nada. PERO NOS SI TIN DEBER! Dus actua,” un usuario a comenta.

Otro a puntra: “Kico ta pasando Aruba? Si esaki ta e trabou di turistanan e ora algo mester cambia. Entre esaki y ATV/UTV e ta un falta di respet. Avisonan definitivamente mester wordo poni hunto cu boetnan si nan wordo viola.”

“Momento pa tuma accion y organisa un evento y benta nan tur abou” ; “Ainda e cos ki ta pasando? Nan no ta stop, mester pone ley cu ta prohibi y trata nan net mucha chikito” ; “Esaki ta un potret hopi tristo. Di berdad hende no tin idea,” ta algun di e otro comentarionan den e publicacion.

E publicacion di Aruba Birdlife Conservation no solamente ta bati alarma pa e actividad, pero aworaki cu e fenomeno aki a yega Baby Beach, algun di e torennan di piedra ta yega 1.7 meter di haltura, cual por ta hopi peligroso, specialmente pa muchanan.