Aruba Birdlife Conservation ta bin treciendo dilanti nan preocupacion pa medio ambiente, entre otro, e creciente construccion di hotel rond di Aruba y con esaki por afecta e ciudadanonan na futuro.

 

E biaha aki, e organisacion ambientalista a trece dilanti informacion riba estudionan realisa pa futuro y perspectiva di turismo cu tambe ta orienta den corto plaso.

Nan a mustra nan cifranan di aña 2016 tocante cuanto migrante ta bay bin Aruba pa un camber di hotel. Nan cifranan ta basa den un periodo di 15 aña y e diferente slidenan ta ilustra con ta calcula e cifra. No ta importa si ta hotelnan chikito of grandi, of si nan ta construi “pariba” of “pabou” di brug. Ta cifranan cu ta relaciona directamente cu empleo.

Tambe lo ta interesante pa calcula cuanto empleo indirecto ta creando y ki impacto esaki ta hayando den e isla, pero pa awor ta trata di empleonan directamente relaciona na cada hotel nobo. Pa esaki nan ta puntra: “Pueblo di Aruba tin derecho di haya sa cuanto ta bay costa nan e hotelnan nobo aki? Pueblo di Aruba tin derecho na transparencia? Of nos ta sigui presenta hotelnan nobo como regalonan na hende, sin mustra intencionalmente loke ta sconde den e bariga di e Trojan Horses bunita aki?”

Recientemente, Aruba Birdlife Conservation a solicita na Gobierno di Aruba pa haci un estudio enfoca riba e impacto cu aumento continuo di turismo ta trece pa e poblacion local, un estudio realisa for di e perspectiva di e localnan, no for di e perspectiva di industrianan.

“Tur di nos por mira facilmente aworaki, despues di tanto aña, cu algun persona ta beneficia di crecemento di turismo, pero cada biaha ta pagando un prijs hopi halto,” e organisacion ta señala.

Nan a publica 10 pregunta pa nan siguidonan y comunidad en general cuminsa pensa riba e consecuencia cu mas hotel nobo por trece, sea pa nan calidad di bida of pa nan saco:

1.- Kico ta sucede cu cultura ora localnan ta bira e minoria den nan mesun pais?

2.- Kico ta sucede ora bo ta cuminsa bira un di e 15 pais cu mas poblacion na mundo?

3.- Con e pakete di AZV a bin evolucionando y kico por spera di dje si e isla ta crece cu 10.000 habitante mas?

4.- Con ta e trafico di Aruba y con lo evoluciona cu otro 10.000 habitante mas?

5.- E aumentonan aki ta bay tin un impacto den nos infrastructura, conservacion y mantenemento? Si acaso e contesta ta si, kico con nos ta bay pag’e?

6.- Bo ta pensando di cumpra un cas? Con e prijs di e casnan y propiedadnan a evoluciona den ultimo 10 aña y kico nos por spera di nos poblacion si lo crece cu 10.000 hende mas?

7.- Algun biaha b’a yega di pensa pakico e cuminsa ta asina caro na Aruba?

8.- Recientemente, director di hospital a bisa na radio cu hospital nobo no a ser construi teniendo na cuenta e aumento di e poblacion, nos mester expande hospital un biaha mas? Ken ta bay paga esaki?

9.- Con scolnan ta bayendo? Con nan a evoluciona durante ultimo 10 aña y kico por spera den proximo 25 aña? Nos lo mester construi scolnan di noticianan? Ken ta bay paga pa esaki?

10.- Tin biaha, e aplicacion di nos leynan tampoco ta parce di por mantene e crecemento di nos poblacion. Poco agentenan di polis, hopi di nan trahando dobel. Nos ta bay ta capaz di satisface e necesidadnan di aplicacion di ley den un poblacion di crecemento? Y ken ta bay paga pa esaki?

Carta na Conseho di Minister y Parlamento di Aruba

A continuacion un parti di loke e carta cu presidente di e fundacion aki, Sr. Greg Peterson a manda tanto na Conseho di Minister como pa Parlamento di Aruba, den cual ta haci un peticion pa diseño y ehecucion di un investigacion integral pa cu e efectonan y e impacto di expansion di acomodacion na Aruba:

“Cu profundo preocupacion encuanto e desaroyo sostenible y futuro bienestar di e habitantenan di nos isla stima Aruba, mi ta dirigi mi na bo persona den mi calidad di presidente di Aruba Birdlife Conservation. Ta danki na e buniteza natural di nos isla y e calor autentico di nos comunidad cu Aruba den transcurso di aña a bira un di e destinacionnan mas renombra na mundo. Sin embargo, e actual trayecto di expansion di acomodacion planifica, continuo construccion di hotel y crecemento sin freno y sin regulacion di turismo ta yama preocupacion significante cu ta exigi atencion y accion inmediato di bo persona como liderazgo Arubano.

“Danki na varios estudio haci pa loke ta crecemento di turismo den e ultimo decadanan ta mas cu claro pa bastante tempo caba cu e actual modelo di crecemento continuo y no controla den turismo, y e expansion relaciona cu esey di acomodacion y desaroyo di hotel no ta sostenibel, ni a corto, ni mediano ni a largo plazo. E resultado di e modelo (obsoleto) di crecemento pa turismo aki ta destrui e patrimonio hopi special – nos medio ambiente natural, nos harmonia social y integridad cultural – cu ta haci Aruba unico. Ademas ta reconoci caba cu e trayecto aki di crecemento turistico continuo ta conduci na un reduccion di e calidad di bida di e habitantenan di nos isla y p’esey finalmente ta haci daño na e experiencia di e bishitante cu ta elemento central den nos industria turistico.

“Den e cuadro aki mi ta pidi bo respetuosamente pero cu urgencia pa, segun encargo di e pais laga ehecuta un estudio amplio, integral y multidisciplinario encuanto e impacto di continuacion di construccion di hotel y expansion turistico na Aruba. E necesidad di un estudio asina ta ser enfatisa pa e caracter compleho di e impacto di expansion turistico cu mester comprende, cu ta encera dimension economico, ecologico, social y di infrastructura. Un acercamento integral y a largo plazo ta esencial pa por haci visibel e efectonan compleho y variable segun tempo.

“E obhetivo primario di e estudio proponi ta pa evalua efecto directo como indirecto riba tereno socio-economico y medio-ambiental, di e continuacion di construccion di hotel. Ta importante pa den esey traha cu varios indicador obhetivo y normanan cientifico. E estudio idealmente lo mester atrae experto di diferente tereno profesional, entre nan economia, urbanismo, sociologia, salubridad publico y mas, pa por garantisa un analisis holistico. Ta di esencial importancia cu den e estudio aki no ta investiga solamente e efectonan a corto plazo, sino cu ta atende tambe e efectonan indirecto a mediano y largo plazo y e implicacionnan di un ‘segundo ola’. Un tal acercamento amplio ta di vital importancia pa por comprende e gama completo di consecuencia cu nos actual modelo di turismo ta ocasiona.

“E esfuerso investigativo aki ta exigi colaboracion entre diferente institucion local manera turismo y institucion liga na turismo, Banco Central di Aruba y Oficina Central di Estadistica pa dato valioso, banda di experto internacional pa perspectiva mas amplio y experticio specialisa. Envolve grupo comunitario, empresa local y explotante turistico lo percura pa punto di bista diverso y perspectiva diferente lo keda recogi y considera, loke lo conduci na resultado mas ekilibra y miho informa.

“Resultado di e estudio aki mester keda estableci den un rapport detaya, cu informacion comprensivo y recomendacion pa maneho, apoya pa medionan auxiliar visual pa por comunica resultadonan di manera efectivo. Ta di crucial importancia cu e estudio ta propone un cuadro di maneho pa desaroyo turistico sostenibel, unda crecemento economico, sostenibilidad ambiental y bienestar social y comunitario, y e interaccion entre esakinan ta ser visualisa.

“E falta di conocemento riba e terenonan menciona aki riba ta fortifica mi conviccion cu e estudio aki no ta solamente necesario, sino urgente tambe. Futuro di comunidad di Aruba ta depende di nos capacidad pa tuma decision bon informa cu ta pone salud y prosperidad a largo plazo di e sistema ecologico di nos isla na prome luga. Nos no por afford di keda riba un rumbo di desaroyo sin por comprende e tipo di implicacion aki completamente.”

Igualmente, Bon Dia Aruba a puntra prome minister Evelyn Wever-Croes si el a tuma nota di e carta aki y kico ta su punto di bista, pa lo cual el a contesta cu e no a ricibi e carta, “Mi a lesa di dje den prensa y mi a mand’e pa e departamentonan concerni traha un advies, mi ta pendiente di e advies,” el a bisa.