Conseho di Ministernan y na Parlamento di Aruba dia 29 di januari ultimo, e fundacion ta bin publicando cifranan tocante e industria turistico y e solicitud di un investigacion pa, entre otro, e creciente construccion di hotelnan rond di Aruba y loke esaki por afecta e ciudadanonan di Aruba.

Recientemente, Aruba Birdlife Conservation mediante un carta a solicita na Gobierno di Aruba pa haci un studio enfoca den loke e turismo y su crecemento continuo ta treciendo na e localnan, un estudio realisa for di e perspectiva di e localnan, no for di e perspectiva di industrianan.

Den e carta, nan ta señala cu danki na varios estudio haci pa loke ta crecemento di turismo den e ultimo decadanan ta mas cu claro pa bastante tempo caba cu e actual modelo di crecemento continuo y no controla den turismo, y e expansion relaciona cu esey di acomodacion y desaroyo di hotel no ta sostenibel, ni a corto, ni mediano ni a largo plaso. E resultado di e modelo (obsoleto) di crecemento pa turismo aki ta destrui e patrimonio hopi special – medio ambiente natural, harmonia social y integridad cultural – cu ta haci Aruba unico. Ademas ta reconoci caba cu e trayecto aki di crecemento turistico continuo ta conduci na un reduccion di e calidad di bida di e habitantenan di e isla y p’esey finalmente ta haci daño na e experiencia di e bishitante cu ta elemento central den nos industria turistico.

E necesidad di un estudio asina ta ser enfatisa pa e caracter compleho di e impacto di expansion turistico cu mester comprende, cu ta encera dimension economico, ecologico, social y di infrastructura. Un acercamento integral y a largo plaso ta esencial pa por haci visibel e efectonan compleho y variable segun tempo.

E obhetivo primario di e estudio proponi ta pa evalua efecto directo como indirecto riba tereno socioeconomico y medio-ambiental, di e continuacion di construccion di hotel. Ta importante pa den esey traha cu varios indicador obhetivo y normanan cientifico. E estudio idealmente lo mester atrae experto di diferente tereno profesional, entre nan economia, urbanismo, sociologia, salubridad publico y mas, pa por garantisa un analisis holistico. Ta di esencial importancia cu den e estudio aki no ta investiga solamente e efectonan a corto plaso, sino cu ta atende tambe e efectonan indirecto a mediano y largo plaso y e implicacionnan di un ‘segundo ola’. Un tal acercamento amplio ta di vital importancia pa por comprende e gama completo di consecuencia cu nos actual modelo di turismo ta ocasiona.

Recientemente e organisacion ambiental a publica cifranan di industria turistico na Aruba, e capacidad y plannan, cu un poblacion di 108.000 persona y number total di 26.295 camber di hotel (registra y no registra) pa cada unidad di camber Aruba ta spera 4 habitante, si ta tuma e superficie di Aruba di 178 km2, esey ta nifica cu tin 148 unidad pa cada km2, nan ta interesa di haya sa “ki tipo di studio di capacidad di carga ta rekeri pa conclui cu te ainda tin mas luga pa hotelnan? y na base di kico?”

Utilisando e formula cu ABC a desaroya for di analisis di Central of Statistics Aruba (CBS) di cada 100 puesto di trabou crea den sector turistico 7% di nan ta ocupa pa hende local. Pa loke ta trata e man di obra migrante, den un tempo entre 3 pa 5 aña na Aruba ta yega 3 co-dependiente y debi cu pa cada unidad ta crea 1.5 puesto di trabou: 4.239 x 1.5= 6.359 puesto di trabou, 93% di 6.359 = 5.913 trahado migrante, 5.913 trahado + 17.740 co-dependiente = 23.653 migrante.

Segun ABC, e plannan di expansion di industria turistico ta implica cu den proximo 8 aña, e poblacion di Aruba ta bay crece cu 23.656 persona stranhero, mester splica con ta usa “e formula di capacidad di carga” pa hustifica e crecemento aki.

E densidad di poblacion di Aruba aworaki ta di 607 habitante pa cada kilometer cuadra y ta bay sigui crece cu e proyectonan di awor te cu 740. Ora mundo ta dividi den sub-region, por mira cu na sur di Asia cu tin e densidad di poblacion mayor di 316,8 persona pa kilometer cuadra, Caribe ta bin despues cu un densidad di 201,5 persona/ km2 y Europa Occidental cu 179,8 persona bibando pa kilometer cuadra, “Aruba ta bay tin un densidad di poblacion dos biaha mas grandi cu e sub-region di Asia,” pa e motibo aki, Arubianonan tin derecho di haya sa “ki formula di capacidad di carga” ta usando pa hustifica un crecemento mayor, segun loke ABC ta manifesta.

Tambe, nan ta indica cu ta spera cu un cantidad grandi di inmigrantenan (entre 5.000 pa 10.000) cu ta sirbi legalmente na industria turistico lo bay cu pension y mester haya un reemplaso pa nan, e number di inmigrante cu lo mester pa cubri e trabounan aki no ta forma parti di e calculonan anterior, loke ta nifica segun ABC ta indica, cu cifranan di inmigracion ta bay ta mas alto cu esun cu a calcula caba.

Ademas, nan tambe a destaca cu esfuerso investigativo aki ta exigi colaboracion entre diferente institucion local manera turismo y institucion liga na turismo, Banco Central di Aruba y Oficina Central di Estadistica pa dato valioso, banda di experto internacional pa perspectiva mas amplio y experticio specialisa.

Envolve grupo comunitario, empresa local y explotante turistico lo percura pa punto di bista diverso y perspectiva diferente lo keda recogi y considera, loke lo conduci na resultado mas ekilibra y miho informa.

Resultado di e estudio cu nan ta solicita mester keda estableci den un rapport detaya, cu informacion comprensivo y recomendacion pa maneho, apoya pa medionan auxiliar visual pa por comunica resultadonan di manera efectivo. Ta di crucial importancia cu e estudio ta propone un cuadro di maneho pa desaroyo turistico sostenibel, unda crecemento economico, sostenibilidad ambiental y bienestar social y comunitario, y e interaccion entre esakinan mester ta visualisa.