Mediante un post publica riba nan pagina di Facebook, e organisacion ambientalista a bati alarma diadomingo ultimo, caminda tabatin un grupo di persona practicando kite surf den un area cu pa ley no ta permiti e deporte aki.
Segun ROPV AB 2021 no.123 ta señala cu e areanan indica pa haci kite surf ta Fisherman’s Huts y Boca Grandi.
Nan a informa cu na Rodgers beach tabatin un grupo di personanan practicando kite surf diadomingo ultimo caminda a bati alarma pa autoridadnan pa asina por logra informa debidamente e personanan aki di kico nan tabata haci den un area na unda na e momentonan aki ta tumando luga e ‘tern breeding season’ unda parhanan cu ta protegi ta reproduci den islanan di rif dilanti Rodgers Beach poniendo nan den peliger.
Esaki ta trata di especienan protegi y nan ta hopi vulnerabel pa lo cual nan ta ser afecta y na momento cu nan ta sinti miedo nan ta bay lagando nan cria bandona cu despues otro parhanan ta come nan.
Pa e motibo ey, nan a pidi encarecidamente na esnan cu ta dedica nan tempo liber pa practica e deporte aki pa haciele den areanan cu ta permiti y no sigui daña naturalesa ni fauna di Aruba.
Mediante comentarionan di diferente usuario a informa tambe cu autoridadnan a yega na e luga e dia ey y ambientalistanan a sigura cu pa un motibo specifico ta prohibi pa realisa kite surf den cierto areanan, manera esaki, na unda tambe nabegacion tampoco ta permiti.
Tambe tabatin algun persona cu a reaccion indicando cu probablemente e personanan aki no tabatin conocemento di na unda si y na unda no ta permiti haci kite surf, pa e motibo ey ta hopi importante pa educa y conscientisa comunidad cu aunke ta trata di parhanan manera Shoco of Prikichi cu tambe ta protegi, e Tern tambe mester ser protegi y esaki ta nan temporada di reproduccion na unda e rif menciona ta nan luga manera un santuario natural.
