Ultimamente por nota mas y mas negoshi cu a cambia di doño, siendo e doñonan nobo inversionista di Venezuela. Varios restaurant conoci a pasa den otro man y recientemente tabatin henter un delegacion di comerciante Venezolano na Aruba pa un encuentro cu posibel socio den un encuentro entre empresario. Straño tabata cu ta gobierno (ministerio di Asunto Economico) a organisa e evento, sin sikiera envolve Camara di Comercio pa duna un man den e organisacion di e evento.
Aparentemente e encuentro tabata fruto di e bon relacionnan cu e ministerio tin cu e pais bisiña na nivel di gobernacion, como consecuencia di e negociacionnan den cuadro di e reactivacion di e refineria. Tambe por a tende di institucion di un Camara di Comercio conhunto Arubano – Venezolano, unda atrobe Camara di Comercio di Aruba no tabata envolvi aden. Parce cu ta ministro di Asunto Economico, a firma e acuerdo aki. Con e asunto aki mester bay funciona si no ta involucra e entidadnan al caso cerca nos, y tur cos ta maneha manera un ‘one man show’ di gobierno, pa nos ta keda un gran pregunta.
E aspecto preocupante no ta e interes comercial riba su mes. Si empresario di otro pais tin interes pa inverti den nos pais ta pasobra nan ta mira oportunidad y esey ta un bon señal, basta ta placa limpi. Preocupante ta cu e pais bisiña ta den un caos politico y economico, unda hopi hende ta busca un otro destino y un di e opcionnan cerca cas ta nos isla. Den e huida di tanto hende tin empresario di conducta intachabel, pero tambe delincuente grandi cu a probecha grandemente den e robo sin precedente cu ta tuma luga na Venezuela.
Den e edicion aki nos por lesa di e proximo accion di autoridadnan Mericano pa confisca propiedad cumpra cu placa horta di e empresa estatal Venezolano PDVSA. Esey ta solamente na Merca, pero nos mester pensa cu na otro paisnan manera Colombia, Panama, Costa Rica, Nicaragua, Mexico, tin un cantidad grandi di empresario cu a traslada nan negoshi, legal o ilegal, pa e paisnan aki.
Aruba tambe a haya su parti y no solamente di e bon muchanan. Dos aña pasa tabatin e caso di ‘El Pollo’ Carvajal, busca internacionalmente pero trankil di dje na Aruba. E otro caso tabata Roberto Rincón, cu a logra trece sumanan grandi na nos isla pa cumpra propiedad, placa procedente di e robo na PDVSA. Mientras cu Rincón su caso tabata abarca como $ 1 biyon, awor ta papia di en total $ 11 biyon na propiedad na Merca cu por keda confisca, tur procedente di PDVSA. E forma con e Chavistanan a scama e compania nacional aki, cu ademas ta e ‘life line’ di henter economia Venezolano, ta probablemente e caso mas grandi di robo den historia di America
Latino.
Pero Rincón y Carvajal probablemente tabata solamente dos di e delincuentenan cu a haya porta habri na Aruba. En realidad nos no sa mes con bon nos autoridadnan ta haciendo nan trabao pa evita cu Aruba ta bira un luga predilecto di inversion dudoso di Venezuela. Y e problema aki no ta un problema pa Banco Central y MOT so, pero tambe pa e banconan comercial cu mester anda cu masha cuidao pa no haya problema cu autoridad Mericano. Nos por referi na e caso di Citibank, cu ayera a stop di ta banco di pago pa Venezuela, pa motibo di e riesgonan di labamento di placa.
Pa bolbe na e delegacion oficial comercial di algun siman pasa, mester puntra kico ta haci cu screening di e hendenan aki. Ningun comerciante den e delegacion aki cu a bin bao di auspicio di gobierno Venezolano ta persona anti-Chavista, si no nan lo no a participa. Esey significa cu por cuminsa screen cada un di nan. E caso di Rincón mes ta ehemplar den esaki. E ta un persona di descendencia humilde cu te na e ‘take over’ di PDVSA pa e hordanan Chavista na 2003 no a yega na ningun tipo di fortuna. Den menos di 10 aña di tempo e persona aki a acumula centenares di miyon di dollar, tur haya cu ‘overpricing’ di trabao y ekipo entrega na PDVSA.
Atrobe, nos mester ta basta preocupa cu e situacion aki na Aruba, unda gobierno aparentemente sin ningun sentido critico ta crea lasonan cu e regimen mes desprestigia di e continente aki. Pa colmo, ya caba nos mandatarionan ta copiando e estilo Chavista, unda ta cera acuerdo directamente cu autoridadnan Venezolano, sin sikiera informa e otro entidadnan concerni. Asina nos por a observa cu a cera acuerdo pa un ferry cuminsa core entre Venezuela y Aruba, pero aki mes e autoridadnan concerni no sa di nada. Manera bisa anteriormente, Camara di Comercio no ta envolvi den nada pero gobierno si a firma pa crea un Camara di Comercio paralelo.
Den e dianan aki di confrontacion grandi atrobe cu e maximo autoridad den Reino, y di politica di porta habri pa tur loke gobierno Venezolano ta desea, cualkier ciudadano consciente mester por bira nervioso. Nos gobierno ta djis sin cuidao?
