Den pasado caba nos a yega di toca e tema di cierto trabao o profesion cu ta bayendo den rumbo di ocupacion ‘parttime’ sin cu oficialmente nan ta conoci como tal. Nos a referi por ehemplo na maestro (no tur) y na docter di cas (no tur), cu ta disponible solamente parti di dia. Cu consecuencia cu trabao ta bin cay pa Hospital, ya cu keintura ta dal hende na final di dia y no mainta. Tambe na e fenomeno di e mastronan cu ta mainta na scol y ta gana mas cu esey dunando ‘bijles’ den oranan di atardi. Pero nos kier bay na e otro ‘parttimernan’ cu actualmente nan mes ta hala atencion. Ta trata di nos parlamentario y ministronan, tambe hopi funcionario publico cu ta studia den tempo di gobierno, manteniendo nan salario por completo. Mester bisa di inicio si cu nos no ta toca e tema aki pa condena e fenomeno di tur banda, pasobra trabao real, aunke parttime, ta trabao y mester honra esey. Mas bien ta bay pa e abuso cu por tuma lugar.

Laga nos cuminza cu bisa cu semper ta di aprecia ora hende banda di nan trabao a inicia otro actividad cu den futuro por ta beneficioso pa nan y pa comunidad. Esey por ta actividad como voluntario, cu por duna nan un vista tocante kico ta pasa den sociedad, banda di nan ambiente di trabao cu nan conoce bon. Si banda di trabao un persona ta tuma iniciativa pa bay haci un estudio, esey ta di aprecia mas ainda, pasobra ta algo di cual su dunador di trabao tambe por beneficia, y lo ta logico cu den bon consulta cu otro ta regla un que otro. Esaki por ta den forma di tempo liber, o cooperacion den tempo di haci examen, etc. Den caso cu e dunador di trabao no ta mira un beneficio directo pa su empresa o organisacion cu e estudio di e persona, e no mester ta mara na colabora den algo cu e no tin beneficio cune.

E problema di e tipo di situacion aki ta cu masha rapido e ta desemboca den iregularidad, unda e asuntonan aki no ta bon regla y controla. Nos tin por ehemplo e caso di ambtenaar cu ta bay studia, sea den exterior cu ‘studie-opdracht’ o localmente na universidad. Esun cu bay exterior di mes caba ta ausente y no ta produci nada mas, di manera cu mester limita e fenomeno aki mas tanto posible. Esnan cu ta bay studia aki ta haya den varios caso tempo durante ora di trabao pa studia y nos sa cu e cosnan aki no ta bon controla, mirando e excesonan cu nos a topa atraves di añanan. Tambe, tin exigencia estricto pa e tempo cu e empleado mester produci toch na su departamento? O nan ta yega ora nan kier, dia nan kier? Y nan ta studiando algo cu tin relevancia actual y posterior pa nan trabao? Ken ta vigila esaki? Tin un maneho di gobierno pa e casonan aki? O ta asina cu ta solamente esnan cu a declara fieldad na e gobierno di turno ta haya e tipo di oportunidad aki? Nos ta puntra pasobra nos conoce bastante hende cu pa nan orguyo personal a studia den nan tempo liber y no a pidi nunca ningun hende fabor (politico).

Awor e otro grupo. Nos tin parlamentario cu ta usa nan tempo cu supuestamente nan mester dedica na percura pa nos pais tin legislacion di calidad, pa bay universidad y cana gaba cu nan ta ‘wetenschaapper’ (cientifico). Nos tabatin den pasado hasta ministro cu den ora di trabao a logra doctora den economia. Logicamente e no a revela cu ta dos studiante Arubano cu cierto talento a produci gran parti di su tesis, pero esey ta keda pa historia. E diferencia cu e funcionario publico cu ta bay universidad, mereci of no, ta cu den e caso aki nos ta papiando di trabao cu pa su caracteristica ta trabao fulltime. Si no ta asina, anto nos por spaar basta placa declarando tur trabao di parlamentario, y si acaso ministro tambe, trabao parttime. Esaki lo por conduci na mihor trabao? Talvez si, pasobra no ta keda tanto tempo pa sinta pensa patraña envez di tuma decision logico, sin perde tempo cu interes di amigo y famia.E por resulta malo si den e sentido cu e ora e politico ta sinti mas hustificacion pa cana busca beneficio otro caminda, pasobra ‘e salario no ta yega’.

Con tal cu nos no sa sigur cu esaki ta conduci na mihor funcionamento di parlamento, pasobra ta un cantidad pober di ley ta pasa tur aña. Y esey tin di haci cu e proceso deficiente di preparacion di ley, cu ta haci cu enberdad ta de vez en cuando un parlamentario mester ta visiblemente presente na Staten, no menospreciando esnan cu ta tuma nan trabao na serio. Mientras tanto, nos pais ta sinta cu un ‘dam’ no yen di awa, sino di centenares di proyecto di ley cu nunca ta yega parlamento.Na un momento cu nos pais ta sclama pa solucion pa nos problema financiero, lo no ta malo pa cuminza paga tur hende, di abao te ariba, segun cu nan ta traha. Nos no ta contra parttime, sino contra pago fulltime pa mitar trabao.