Redaccion di Bon Dia Aruba a deposita algun pregunta encuanto e actual crisis di salud y economico cerca Asociacion di Bankero di Aruba (Aruba Bankers’ Association; ABA). Manera ta birando rapidamente parti di nos manera di comunica, esaki a bay den forma digital.

Durante lo cual e asociacion ta califica como e desafio mas serio pa e institucionnan financiero den casi un siglo, y segun e consecuencianan economico ta sigui expande, e banconan comercial na Aruba ta haciendo tur lo cual nan por pa logra e prioridadnan cu ta rekeri paso concreto awor. Esaki ta implica ‘reposiciona nan mes awor, mientras ta ahusta/recalibra pa futuro.” Mester mantene e canalnan di distribucion habri, a pesar di e reto di distanciamento social y e funcionnan di supervision y cumplimiento cu a diseña pa por traha for di cas.’

Tambe ta señala como necesario administra entrada y expectativa di e clientenan, a pesar di e bahada drastico di nan entrada y e presion riba consumidor y negoshinan. E asociacion ta señala como un reto tambe pa keda atento pa loke ta cada banco su strategia y ‘brand’ cu ta defini futuro di cada un di nan, ya cu e cambionan den mercado y den comportamento di e consumidor potencialmente lo cambia pa motibo di e crisis.

Por observa e cambio cerca e banconan comercial caba, unda bao presion di e crisis, cu e imposibilidad di yega en persona na banco, tanto pa personal como pa cliente, a conduci na uso mas intensivo di medionan digital.Tambe ta mustra riba e inclusion di equipo mas flexible den organisacion di trabao pa por atende e demanda di servicio.  “E cultura bancario, den otro palabra, e forma di interacciona, comunica y realisa transaccion cu banconan lo cambia. Eficiencianan bancario nobo lo bira e normal-nobo,” e asociacion ta conta.

Situacion cliente empresarial/individual

CBA a amplia liquidez pa e banconan comercial, pa por atende nan clientenan mihor. BDA tabata interesa pa sa con banconan ta anda cu esaki, tambe en vista di e hecho cu talvez no tin tanto demanda pa mas prestamo.

Segun ABA, e banconan comercial ta den e wowo di e tormenta economico di Covid-19, trahando pa yuda negoshinan pa tene cabez ariba awa, mientras nan ta  lucha pa nan propio continuidad di servicio. E ampliacion di liquidez ta permiti e banconan pa sigui refinancia gran parti di nan portfolio debi na desempleo di e clientenan y nan perdida di entrada. A mira un aumento grandi den necesidad pa refinancia debe/prestamo/overdraft pa re(inicia) negoshi,  den espera di apertura di economia y frontera.

Tambe tin e reto di reduccion drastico di transaccion bancario, debi na e cantidad di negoshi den sector turistico y relaciona cu turismo, cu ta cera pa un periodo, y por lo tanto ta haci menos transaccion. Tambe e empleadonan a perde entrada y mester menos servicio bancario.

Esaki ta trece e necesidad di fortifica equiponan di “credit risk” y “accounting” pa determina e aumento den perdida cu ta afecta entrada. Bastante esfuerzo ta bay den atende cliente pa logra refinanciamento di hipoteca y otro prestamo pa consumidor, y pa extension di plannan di alivio pa e proximo periodo, cu por bira bastante dificil ainda, mirando e incertidumbre con largo e crisis lo t’ey. E banconan a mira un crecemento den solicitud pa plannan di alivio pa yuda individuo y negoshi mantene cabes ariba awa.

En general, e banconan ta asisti nan clientela lo mihor posible, mitigando asina tambe e riesgonan pa nan mes, e asociacion ta declara. E avance den comunicacion digital y for di distancia ta obedece na e normanan nobo pa mantene distancia, pero e formanan di comunicacion digital tabata un proceso cu tabata tumando lugar caba, y no pa e sector bancario so. E crisis a bin ta acelera henter e proceso aki sin embargo, unda hopi empresa a ‘step up’ nan comunicacion digital y operacion for di distancia.