E clientenan di banco cu a cera fiansa cerca nan, ta wak cu cierto preocupacion cu e periodo di gracia di tres luna cu e sector bancario a duna, ta yegando su final.
Tin clientenan cu a keda sin trabao of nan entrada a bay atras substancialmente. Of nan ta hayando algun entrada via e plan di ayudo di gobierno pa medio di FASE y/of subsidio di salario otorga pa cierto companianan. Pero cu e ayudo aki, dificilmente nan por yega pa atende nan necesidadnan y compromisonan basico.
Algun clientenan a laga sa e matutino aki cu nan no ta mucho contento cu banco cu a kita tur nan entrada di biaha pa prestamo atrasa. Esaki a pesar cu a yega na areglo cu nan. Bon Dia Aruba a tuma contacto cu e banco menciona, y nan no ta na haltura cu algo asina por a sosode cu algun di nan clientenan. Principalmente cu nan a yega di anuncia recientemente e di dos plan di alivio pa tur nan clientenan cu ta afecta cu e situacion actual ocasiona pa e crisis di coronavirus/Covid19.
Nan a laga sa cu cada caso di cada cliente ta diferente. Nan ta traha tambe ariba un base di caso pa caso, pa trece e solucion cu cada cliente mester. Ta asina cu Aruba Bank ta anuncia extension di asistencia pa cliente cu ta sigui mira bahada di ingreso debi na crisis di Covid-19
E entidad bancario aki ta sigui traha pa busca solucion na e clientenan cu a confronta problema financiero den nan entrada debi na e crisis de Covid-19.
E banco a anuncia su esfuerso pa extende su asistencia na clientenan, individuo y negoshi, cu ta sigui mira bahada den na ingresonan. Lo sigui evalua e asistencia temporal, segun e situacion ta sigui desaroya den e proximo lunanan. Tambe nan lo diseña asistencia pa cada cliente, segun su necesidad.
E banco a laga sa cu nan tin comprension pa e presion financiero cu nan clientenan ta enfrenta y nan t’ey pa yuda. Tur cliente cu ta sigui wordo afecta financieramente pa e crisis di Covid-19, por pidi asistencia aki: https://www.arubabank.com/plan-alivio-dos.
Clientenan comercial por tuma contacto cu nan account manager directamente pa ricibi asistencia. Tambe esunnan interesa pa haya mas informacion por tuma contact cu nan via nan Contact Center na 527-7777 pa informacion of asistencia. Of nan por bishita nan website: www.arubabank.com/corona-news pa tur anuncio.
