Ayera mainta Aruba Bank a cera un acuerdo cu Aruba Scholarship Foundation pa asina contribui cu educacion y formacion di e futuro lidernan.

Den cuadro di esaki, Edseline Leer – Semeleer, ken ta fungi como Head of Retail Banking di Aruba Bank a expresa cu educacion ta e herment mas poderoso cu por usa pa cambia mundo, pa medio di e partnership cu Aruba Scholarship Foundation nan ta prepara e caminda pa un futuro mas briyante pa e hobennan.

Nan compromiso pa contribui cu un monto di 36.000 florin pa e proximo 4 aña no ta solamente un aporte monetario manera Leer a splica, e ta demostra tambe e confiansa cu nan tin den e potencial di e hobennan y e futuro lidernan di e comunidad.

“Danki na Aruba Scholarship Foundation tambe pa duna nos e oportunidad di forma parti di e tremendo programa aki y nos por yuda tambe na aporta y contribui cu educacion na nos hobennan”, Leer a bisa.

Di su parti, Ramon Ras Head of Corporate & Platinum Banking di Aruba Bank a comenta cu ayera Aruba Bank hunto cu Aruba Scholarship Foundation a celebra un logro den envolvimento comunitario y apoyo pa educacion marcando e comienso di un partnership prometedor, segun el a afirma, ademas a reitera cu e acuerdo aki ta refleha nan dedicacion pa hubentud di Aruba reconociendo cu e progreso di e comunidad ta keda den educacion di e muchanan.

“Nos ta honra di contribui na e causa aki sigurando cu bareranan financiero no ta impedi e soñonan y aspiracionnan di studiantenan hoben, na studiantenan cu lo beneficia di e beca aki, soña sin limite, traha duro y corda cu nos comunidad ta kere den bo, bo exito ta nos exito, danki na tur esnan involucra cu a haci pa e partnership aki bira un realidad, hunto nos ta haciendo un diferencia den e bida di nos studiantenan y e futuro di Aruba,” Ras a sigura.

E acuerdo, firma riba 1 di februari 2024, ta e compromiso di Aruba Bank pa contribui cu 9.000 florin anualmente durante e proximo cuater aña, cuminsando for di e aña academico 2024-2025 te cu 2027-2028, pa financia “scholarship” pa e studiantenan local.

Lydia Emerencia ken ta secretaria di directiva di Aruba Scholarship Foundation a splica cu esaki ta un donacion hopi significativo pa nan como fundacion cu ta existi for di algun añanan caba y pa hopi tempo ta haciendo su esfuerso pa por yuda studiantenan, particularmente esnan cu kier studia na Merca, yuda nan pa por haci esey financieramente posibel, “como fundacion pa nos por logra e meta ey, nos ta depende totalmente di e bon boluntad di comunidad di Aruba, di individuonan pero tambe di companianan of organisacionnan grandi manera Aruba Bank, pa e motibo ey den nomber di Aruba Scholarship Foundation y nos studiantenan akinan nos ta expresa nos gratitud inmenso pa e gesto aki,” el a sigura.

Ademas, Emerencia tambe a trece dilanti cu Aruba Scholarship Foundation a haci un diferencia na Aruba pa loke ta trata e formacion di su cuadro profesional, durante di añanan por medio di e beca, maske ta un beca parcial, toch e ta haci e studio posibel pa hopi persona cu a bay afo studia na diferente pais y nan a bin back Aruba, tumando posicionnan hopi clave den comunidad.

“Estudio ta importante y estudio academico ta importante y necesario pa nos contribui pa nos por forma nos propio hendenan akinan na Aruba pa nan tuma e posicionnan di liderazgo den nos comunidad,” Emerencia a bisa.

Aruba Scholarship Foundation ta un fundacion cu a lanta mas di 30 aña pasa door di ciudadanonan di Aruba cu a mira e necesidad pa apoya studiantenan di Aruba pa nan por bay studia den exterior, specificamente na Merca, pa motibo cu studionan ayanan ta hopi caro y no semper alumnonan cu lo kier bay tin e medionan financiero.

Ademas tin hopi studiante cu ta scoge pa studia na Merca y no Hulanda, debi na e carera cu nan ta preferi pa nan futuro, eynan a lanta Aruba Scholarship Foundation cu e intencion pa acumula e fondonan necesario pa por yuda e studiantenan aki haci nan soño posibel di manera parcial, no totalmente pa motibo cu nan no tin e capacidad pa financia nan carera completamente, manera Emerencia a declara.

Nan tin un sistema di screening cu aspectonan social, unda studiantenan realmente por mustra e necesidad pa por bin na remarca pero tambe cu nan tin e motivacion y e capacidad pa studia na universidad cu un grado academico halto “kiermen nos mester ta sigur cu nan por tin e capacidad y e motivacion pa nan por logra esey.”

Como directiva nan ta satisfecho y orguyoso pa mira e resultado durante añanan caminda personanan cu a haci uso di Aruba Scholarship Foundation awendia tin posicionnan clave den comunidad tanto den sector publico como den sector priva y nan a hunga un papel importante den esey.