Aruba Bank a logra reestablece servicionan cu a ser interumpi debi na fayo inespera

For di 19 di september, Aruba Bank a informa su clientenan cu nan tabata experenciando problemanan tecnico y cu nan tabata trahando pa resolve nan lo mas pronto posibel, e fayo a genera incovenientenan specificamente den transaccionnan mas usa manera ATM y Aruba Bank Online.

For di diahuebs ultimo servicionan Aruba Bank App, Aruba Bank Online, Aruba Bank Master Card Debit Cards, ATM, POS terminals y website no tabata disponibel debi na dificultadnan tecnico cu e banco tabata presentando.

Siguientemente, a anuncia cu nan tabata compronde la importancia di por resolve e problema pa loke tabata trata e servicionan Online.

Diasabra ultimo, Aruba Bank a manda un comunicado indicando cu “Ta informa clientenan tocante reestablecemento di servicio despues di interupcion temporal.”

Den e comunicado a menciona cu “Aruba Bank ta informa su clientenan cu su servicio bancario a ser reestableci despues di un interupcion inespera. Durante e periodo aki, Online Banking y transaccionnan via Aruba Bank App tabata temporalmente afecta. E interupcion a ser causa pa un fayo inespera den un generator na nos sucursal na Camacuri, cu a causa un shut-down di nos centro di data. Nos ta pidi disculpa di curason pa e inconveniencia cu e situacion aki por a causa y nos ta compronde e impacto ariba e actividadnan diario. Nos ta sumamente agradecido pa e pasenshi y sosten mientras cu nos ekipo di expertonan tabata traha duro pa resolve e problema.”

Sinembargo, riba rednan social usuarionan tabata splica na e momento ey cu e banca online no tabata funcionando loke a causa mal contento debi cu ta hopi usuario ta usa e servicio ey pa paga diferente servicio y productonan caminda un usuario a yega di skirbi cu e incidente aki “tabata afectando economia di Aruba pa dos dia caba”. Awendia no ta hopi esnan cu ta cana cu placa cash den nan cartera y ta prefera di usa e servicionan di banca online manera a trece dilanti.

Pa finalisa, nan a trece dilanti cu “Nos ta pidi disculpa di curason pa e inconveniencia cu e situacion aki por a causa y nos ta compronde e impacto ariba e actividadnan diario. Nos ta sumamente agradecido pa e pasenshi y sosten mientras cu nos ekipo di expertonan tabata traha duro pa resolve e problema. Aruba Bank ta comprometi pa duna un servicio bancario confiabel y sin interupcion. Danki pa e confiansa y comprension.”