Ayera Corte di Apelacion a cambia e sentencia inicial den caso di Aruba Bank contra Bochincha Container Yard (BCY) y Otmar Oduber. Corte a duna Aruba Bank rason, revocando e sentencia di Corte den Prome Instancia di februari 2021 cu a obliga e banco pa habri un cuenta comercial pa BCY y Sr. Oduber.
E veredicto nobo aki di Corte di Apelacion ta nifica cu no por obliga Aruba Bank pa tin un cuenta di banco pa BCY, compania di cual Sr. Oduber ta doño.
Anteriormente Oduber a dicidi pa cuminsa un caso contra Aruba Bank pasobra e banco aki semper tabata su banco y di su famia y nan no kier a habri un cuenta pa su negoshi, BCY, cu e compania mester di dje pa su operacionnan diario.
Banco a bisa cu nan tin miedo cu e scandal rond di Oduber – relaciona cu caso Flamingo – lo por tin of duna nan un mal reputacion door di keda asocia cune.
Aruba Bank a cumpli cu e sentencia, pero dos dia despues a apela e sentencia. Un luna despues di introduci nan apelacion, Aruba Bank a pidi pa mientras nan ta warda ariba caso di apelacion, pa suspende e sentencia anterior, pero corte a rechasa esaki.
Den luna di September ultimo e caso di apelacion a tuma lugar y ayera, tres hues di Corte di Apelacion a dicta na fabor di Aruba Bank y a revoca e sentencia di e caso anterior.
Den su sentencia Corte di Apelacion a splica cu teniendo na cuenta no solamente loke ta sucede alrededor di Oduber cu e caso penal Flamingo, pero tambe otro asuntonan comercial cu ta tuma luga den e negoshi di BCY, e corte ta indica cu esaki ta trece duda pa loke ta e tipo di negoshi cu e compania BCY ta maneha.
Nan ta remarca cu e ta bira dificil pa e banco por tin un control necesario ariba e fluho di placa, entre otro, cual por pone na peliger tambe Aruba Bank su relacion cu banconan internacional.
