Ayera mainta riba rednan social por a mira basta comentario di hende cu ta cliente di e agencia bancario Aruba Bank, cu a registra retironan no autorisa for di nan cuenta di banco.
Pa cu esaki, un di varios usuario riba rednan social tabata señala cu su cuenta di banco a bira victima di hacking y cu a keda den cifra negativo.
Mientras tanto riba Facebook page di Aruba Bank tabata informa:
“Awe mainta nos a constata, cu algun cliente a descubri cobransa “no autorisa” ariba nan tarheta di debito. E incidente ta wordo investiga y ta den man di e departamento corespondiente. Tur cliente afecta lo wordo contacta y banco lo debolbe e suma en cuestion na cada un debidamente”.
Redactor di Bon Dia Aruba a tuma contacto cu PR di Aruba Bank pa puntra si ta berdad cu a hack nan sistema y tambe pa asina duna un informacion tocante e problema aki. Nan manda un comunicado indicando:
“Aruba Bank ta reembolsa cliente dentro di 24 ora: Awe mainta (ayera) Aruba Bank a constata cu algun cliente cu tin e Debit Card, a descubri cobransa “no autorisa”. Nos a determina cu esaki a wordo causa por medio di negoshinan online cu a wordo comprometi. Mientrastanto e companianan internacional a wordo blokia.
“Banco a identifica e clientenan cu a wordo afecta. Pa mitiga e riesgo, banco a desactiva e opcion pa haci compras “online”, temporalmente. Esaki lo wordo restaura unabes e situacion lo wordo resolvi. Tur otro transaccion cu Tarheta di Debito por continua normal.”
Nan a finalisa nan comunicado bisando cu Aruba Bank tin como meta pa debolbe e suma en cuestion na cada un di e clientenan afecta, dentro di 24 ora.
