Cada rato nos ta tende e sindicalistanan cu ta representa empleado publico vocifera cu “gobierno a bolbe na normalidad, nos a bolbe na normalidad”; exigiendo cu nan salario tambe lo mester bolbe ‘na normalidad’. Tambe, manera tur e tempo caba, nan ta referi na e compromiso cu nan tabatin cu gobierno pa entrega salario pa mustra solidaridad cu otronan den comunidad cu tabata den necesidad. Aki en verdad for di banda di gobierno a referi na e personanan cu lo a haya subsidio di e areglo di Fase. Esaki naturalmente tabata política barata di hunga cu sentimento di hende, mientras tabata bon cla cu e placa cu gobierno ta spaar cu e medida riba salario ey ta bay den e caha general y no tabata destina pa paga specificamente e areglo di emergencia ey. Awor, esun cu a arma e baina mal pensa aki lo mester para pa e consecuencianan, cual ta e accionnan cu e sindicatonan tin planea, si nan no a haya salario back.

Pero poniendo e tema particular di salario recorta un banda, cu sigur lo haya su capitulonan di continuacion, tin hopi mas tereno riba cual lo ta bon pa nos bolbe na ‘normalidad’. Manera nos economia, cu ta recuperando pero ta leu di ta unda e tabata. Gobierno su finanzas sigur no a bolbe unda e tabata. Por mira cu entrada di impuesto na 2021 tabata apenas alrededor di 24 miyon florin mas cu den e aña di desastre 2020, y ta casi 300 miyon menos cu e aña di referencia, 2019. Pues nos tin caminda nos dilanti ainda pa yega ey.

Pero nos tin mas aspecto unda lo ta bon pa nos yega na normalidad. Por ehemplo nos infrastructura, cu ta parce di ta den olvido casi completo. Un recorido riba nos isla ta duna e conclusion, cu sea ta drecha e estado di mayoria di e careteranan drasticamente, o por lo menos gobierno mester considera kita tur impuesto di importacion riba shock absorber y otro pieza bao di vehiculo. Fuera di e careteranan construi recientemente, e situacion ta simplemente deplorable, unda apenas ta logra cubri e buraconan mas obvio cu poco asfalt, loke no ta mehora nan condicion tanto tampoco. Pero esey no ta tur.

E centronan di ciudad ta otro desastre. Ta normal, pa usa e palabra ey atrobe, cu bo ta pasa dilanti oficina di Gobernador anochi, cu masha cuidao pa no trompica y kibra un pia, pa falta di iluminacion drechi y un acera totalmente desnivela? Otro partinan no ta mucho mihor tampoco y bo ta puntra bo mes pakico nos lo mester ta orguyoso di algo asina mal manteni. No comprende nos malo: a hinca hopi placa publico y priva den drecha cierto edificio, cu sigur a duna un aporte na con e ciudad ta mustra awendia. Pero ta parce cu ta nos idiosincracia pa cuminza trabao pero nunca caba cune. E parkeo dilanti Bestuurskantoor tin asfalt asina deteriora cu ta parce un lugar exclusivamente pa 4-wheel drive. No ta drecha e cos ey mas?

Tambe e situacion dilanti e hotelnan merece atencion. Nos ta core e riesgo di haya e critica cu ta pone turismo dilanti, pero ta manera di presenta nos isla na bishitante cu un caya tur kibra, mal ilumina, cu cada biaha cu awa yobe ta forma un plas enorme cu ta tuma varios dia pa seca? No ta turista so ta core ey, nos tambe como ciudadano di e pais aki.

Naturalmente lo bisa como defensa cu ‘no hay plata pa tanta calle’ o algo por el estilo, pero e siguiente pregunta di inmediato lo ta: “Y pakico no tin placa?” Entre otro, pasobra nos ta pagando como un cuart biyon florin pa aña na interes riba prestamo, y esey lo bira mas despues di april, ora e prestamonan Hulandes sin interes keda cambia den prestamo cu interes. Tambe pasobra nos ta mantene un payroll increible cu ta guli mitar di presupuesto di gobierno anualmente. Y nos no ta mira nada na caminda pa cuminza traha riba e cosnan aki, pa crea espacio financiero pa por atende e necesidadnan ‘normal’ den un pais ‘normal’ cu ta respeta su mes. Nos tin razon di enfoca riba situacion intolerable manera na e facilidad di purificacion di awa na Bubali, o e situacion di e dump na Parkietenbos, pero eseynan ta djis e ehemplonan mas palpable di un situacion general di desgobernacion, unda no tin debido atencion pa nada cu ta requeri mantenimento.

Awor, pa pone esey bon cla tambe: esaki tur ta culpa di e actual gobierno?

Absolutamente cu no; e ta e acumulacion di desatencion y desperdicio di recurso publico den cos inutil durante varios decada, unda tur cu a goberna ta carga parti di e responsabilidad. Pero, na e momento aki ta esun cu t’ey por actua, no esunnan cu a bay caba. Anto ta esun aki lo mester hacie, y si den serio nan ta desea di haci esey, nan cuminza cu tuma e medidanan necesario pa Aruba pa bolbe na normalidad di berdad, den tur aspecto. Y si esey ta requeri di deshaci di un clase privilegia di entorno politico cu ta yena gobernacion y e entidadnan semi-estatal, y cu ta competi den ken ta cumpra e SUV mas caro, mientras hopi famia no tin pan riba mesa: ‘que sea asi’.