Diahuebs 12 di januari CEDE Aruba a lansa e “Guia Comunitario Aruba” na Cas di Cultura. Hopi organisacion social di Aruba a bishita e evento exitoso aki. E Guia Comunitario ta un iniciativa di CEDE Aruba hunto cu varios partners, entre otro MultiMedia NV cu a traha e website www.org.aw y fundacion Respetami cu a yuda hopi pa yena e guia cu informacion di fundacionnan.
Tambe CEDE Aruba lo kier gradici e siguiente partners y colaboradornan pa nan ayudo y sosten pa e desaroyo di Guia Comunitario: Setar, VNO, Prins Bernhard Cultuurfonds, MOBIS, Aruba Sport Unie, SABA, Fundacion Salba nos Burico, Trampolin pa Trabao, Stichting Eliezer, Pure Aruba Events Foundation, Adctra, The LAB, Vertaalburo Stronks, Dushi PasaBoca, SKOA, DPS, Medwork, Departamento di Salud Publico, Departamento di Asunto Social, Departamento di Enseñansa, Departamento di Cultura, Ibisa, Bureau Traimerdia, Purple Entertainment Group, Sonrisa Vereniging, Fundacion pa nos muchanan, ATHA, Biblioteca Nacional y COA.
Anochi di lansamento di Guia Comunitario
Daniel Tecklenborg, director di CEDE Aruba, a splica durante e anochi aki cu comunidad pa añas caba ta puntrando pa un manera mas facil pa haya informacion actual di organisacionnan na Aruba. Cu e Guia Comunitario tur hende na Aruba por busca informacion tocante servicionan ariba e tereno bienestar. E Guia Comunitario ta duna hopi informacion manera: e informacion di contacto, metanan di e organisacion, informacion tocante servicionan, orarionan di oficina y tambe e forma con pa aplica pa un servicio. Lo por busca e servicionan den diferente districto como tambe den categorianan di servicio. E Guia Comunitario tambe ta un medio importante pa trahadonan social. Lo nan por haya bista ariba servicionan cu normalmente no ta facil pa haya. CEDE Aruba su meta ta pa Guia Comunitario contene tur organisacion Arubiano riba tereno social, educativo, recreativo, cultural, vivienda, bario, empleo, salud y medio ambiente.
Yolanda Richardson-Smit, cu ta lider di e proyecto aki, a papia tocante e desaroyo di e website. Casi 200 organisacion a registra caba, pero ainda tin organisacion cu falta pa registra. Nan por haci esaki riba www.ORG.aw. Cada organisacion cu ta registra lo ta responsabel pa mantene su informacion “up to date”. Despues di e discursonan e publico presente por a wak e 8 infomercials cu a ser traha pa cada categoria cu a ser uza den e Guia Comunitario y despues e ora a yega pa e lansamento mes. Tur hende presente na e evento a ‘countdown’ hunto pa e lansamento oficial di e website www.ORG.aw. Tambe nan por a busca nan mesun organisacion den Guia Comunitario riba nan smartphone.
Awor cu Guia Comunitario a wordo lansa, CEDE Aruba lo traha ariba diferente proyecto cu ta conecta na e Guia Comunitario, esta un website pa recluta boluntario y pa promociona eventonan den nos comunidad. Na e momento cu tur esaki a ser realisa lo por integra e plataformanan aki den un app, cual lo duna mas opcion ainda pa comunica cu tur organisacion.
Pa mas informacion of sugerencia tocante e Guia Comunitario por tuma contacto cu Yolanda Richardson-Smit na CEDE Aruba via info@org.aw of 582-7666.
