Aruba awor cu autoridad pa controla formacion di cartel: Consumidornan pa hopi aña exponi na palabracion di prijs

Pa hopi tempo, sector bancario y di supermercado tabata hiba un maneho estilo cartel cu ta stroba competencia, cu desbentaha pa e Consumidor Arubiano. Pa e motibo ey mes, Gobierno a bin cu e asina yama Landsverordening Mededinging Aruba. Siman pasa Parlamento a aproba e proyecto aki cu ta e Ley riba Competencia.

Kisas pa Arubianonan, e nomber Ingles ‘Antitrust Law’ ta zona mas familiar. E ta nifica cu awor Aruba tin base legal pa creacion di un Autoridad Mercado y Consumidor, cu tin e poder pa controla si companianan ta palabra prijs y posicion di poder. Un palabracion asina entre companianan di e mesun sector ta bay contra e principio di un mercado economico liber, unda esun cu miho prijs of miho producto ta haya mas cliente. Un mercado unda e cliente ta sali ganado.

Segun e splicacion di e ley, cambionan economico na nivel local y internacional ta motibo pakico mester bin cu e ley aki. Globalisacion di relacionnan economico, desaroyo tecnologico rapido y e kitamento global di limitacionnan di comercio tin como consecuencia cu concurencia internacional ta bira mas prominente na Aruba tambe.

E concurencia cu por a brinda a cambio di importacion, y sectornan comercial cu te cu un par di tempo pasa por a proteha nan mes contra producto y servicio di afo ta confronta un realidad diferente. Esaki ta debi na e desaroyo di telecomunicacion, unda inversion geografico a haya un mobilidad mas halto. Como tal, actividadnan di operacion di un compania no mester ta mara na un oficina fisico. E ta trece risico pa actividadnan existente, pero ta brinda oportunidad nobo.

Pues, tin un ambiente comercial externo cu ta cambiando tur dia y tin su efecto pa entrada, bienestar, mercado laboral y sostenibilidad. Y e ta rekeri exigencia nobo pa Gobierno y sector priva. E intencion di e ley ta pa percura cu tin mercadonan di producto y servicio cu ta funciona bon, pero cu tambe por ta agil pa responde na cambionan necesario pa economia di Aruba.

Cartel

Si companianan uni den un cartel of ta funciona manera un cartel pa asina proteha nan mes, ta malo pa e posibilidad di prestacion di un pais. Mescos ta conta pa concentracion di poder economico. Realidad ta mustra cu mercado liber riba su so sinembargo, no ta brinda suficiente control. Como tal un maneho publico contra palabracionnan economico ta necesario. Segun e Memorie van Toelichting tin hopi area unda Gobierno por asumi un papel di regula of brinda proteccion. Algun ehempel ta riba siguridad social y siguridad publico. Riba otro areanan, Gobierno mes ta ofrece servicio y producto. Ambicionnan economico di Aruba lo mester ta carga pa actividadnan y decisionnan liber di empresanan, cu ta keda recompensa pa concurencia husto, tanto local y internacional.

Un efecto indesea di restriccion monopolistico y di cartel, ta un reparticion menos eficiente. E ta nifica un efecto negativo riba prijs. E funcion primario di mecanismo di mercado ta cu empresarionan, trahadonan y Consumidornan ta dirigi e prijs, pero tambe ta stimula y disciplina. Ora cu e mecanismo aki no ta funciona, ta nifica cu un reduccion di calidad y e estimulo pa busca producto of servicio miho of nobo. A lo largo esakinan ta conduci na aumento di gasto pa tanto e inversionista como Consumidor. Mesun cos ta conta pa concentracion di poder di mercado. Exigencianan di concurencia internacional ta rekeri un habilidad pa ta alerta, flexibel y pa ta innovacion cu un clima di proteccion ta dificulta. Den su argumento, Gobierno ta bisa cu e maneho nobo di competencia lo contribui na cambio di cultura y limitacion di concurencia door di palabracionnan, of dor di abuso di posicion di poder como tal ta keda rechasa “a lo menos cu limitacion di competencia den algun forma di cooperacion ta aceptabel.”

Concentracion poder

Segun Gobierno, e ta necesario pa bin cu provision ora ta trata di concentracion, cu ta un elemento grandi di e maneho di competencia. Banda di palabracionnan y abuso di posicion, concentracion tambe ta forma menasa pa competencia. Aki por pensa riba fusion di companianan of compra di companianan cu ta produci un posicion di poder of ta reenforsa e posicion fuerte aki caba. E ley sinembargo no ta brinda supervision riba concentracion di mercado, pero unicamente un obligacion pa raporta tal. Door di limita e supervision na unicamente un obligacion di raporta, ta duna e Autoridad di Mercado y Consumidor espacio pa formula su prioridadnan cu na prome luga ta atende cu formacion di cartel y abuso. Lo considera si mester trece cambio den esaki aki cinco (5) aña, ora evalua e funcionamento di e ley.

E obhetivo di e maneho di competencia y e ley ta pa yega na un mercado cu ta funciona bon, unda e ciudadano, cu por lo general ta e Consumidor, lo por saca e miho probecho. Segun Gobierno, e ley pues ta pa fortifica e posicion di e Consumidor.

Investigacion competencia na Aruba

Gobierno a laga e Stichting Economisch Onderzoek (SEO) di Hulanda pa haci un investigacion na e practicanan di competencia na Aruba. E investigacion aki, ‘Na Caminda pa Competencia Efectivo na Aruba,’ a dirigi su mes riba tres sector, cu ta e mercado por mayor y detal, e mercado di transporte maritimo di carga y producto bancario. For di e investigacion a sali afo cu tin problema den e competencia y tambe e forma con Gobierno por actua den e structura di mercado y resultado. Den otro palabra, competencia na Aruba den e tres sectornan aki no ta funciona debidamente. Den dos di e tres sectornan tin comportamentonan cu ta stroba competencia na forma serio, cu ta rekeri intervencion di un autoridad. Tin un palabracion estilo di cartel te restriccion di oferta den e mercado di comestibel na nivel regional y e asociacion di sector di supermercado ta trata di canalisa y limita competencia. Pa loke ta e mercado di servicio bancario, Fundacion Cas pa Comunidad Arubano, FCCA, ta obliga pa financia hypotheeknan pa gruponan di entrada mas abou door di traha unicamente cu un consorcio di banco, compania di seguro y fondo di pensioen, cu ta nifica cu no tin competencia entre e instancianan aki.

E comportamentonan aki cu ta limita competencia ta prohibi cu e Ley di Competencia. SEO tambe a constata cu e falta di competencia aki y e fayo di Gobierno pa actua tin efectonan indesea y ta conduci na ineficiencia den mercado.

E autoridad di competencia lo por hunga un papel crucial, particularmente ora di planea y conseha riba e forma con Gobierno por interveni, sin cu e ta stroba competencia. Un maneho efectivo di competencia como tal lo fortifica economia di Aruba y posicion di e Consumidor y ciudadano.

Autoridad Competencia Husto Aruba

E autoridad competente pa supervisa competencia husto ta awor pa regla pa ley y ta un instancia cu su mesun posicion huridico. E ‘Aruban Fair Trade Authority’ of Autoridad Competencia Husto Aruba lo ta dirigi pa un Conseho di Directiva, cu ta consisti di e Presidente y miembronan. Nombracion e Presidente y dos miembro special, nombra segun decision gubernamental a base di nan experticio riba e tereno concerni y tambe nan conocemento social y experiencia. Nan por nombra e otro miembronan. E nombracion ta pa cinco (5) cu posibilidad di extension di otro cinco. Director di entidad por participa na e reunionnan di Directiva pero no por vota. E ley ta describi e rekisitonan pa forma parti di directiva, unda entre otro mester evita conflicto di interes politico y comercial.

E ta yamativo si cu mientras cu e ley ta boga pa un mercado liber, sin formacion di cartel of concentracion di poder, netamente ta Gobierno mes ta sostene cu Utilities Aruba NV, cu ta dirigi dos compania monopolistico, esta WEB NV y ELMAR NV, ademas cu Gobierno tambe ta accionista unico di Setar NV, otro compania cu a concentra hopi poder bou su maneho.