Aruba Art Fair: ‘Creando plataforma pa artista’

Aruba Art Fair ta cuminsa awe y ta dura te cu diadomingo. Esaki ta pa di 4 aña cu ta tene actividad di arte. E evento ta pa crea un plataforma local y internacional pa exhibi arte den cualkier forma. Recientemente a nombra San Nicolas como e ‘Street Art Capital of the Caribbean’.

Tito Bolivar, organisado di Art Fair, a splica cu lo tin artista, artesano local y internacional cu lo mustra nan obra di arte den nan forma. Lo tin musica poesia, baile, teatro y obranan di caya. Tambe lo conta cu pop-up restaurant.

San Nicolas, cu a haya nomber di Street Art Capital City menciona pa Forbes, ta pa e muralnan laga atras pa mas di 30 artista for di varios luga rond mundo. Tambe diseñador local, Robby Solognier, Armando Goedgedrag, George Rossel. E aña aki, Rachid Lowe, hoben di 15 aña di edad, lo traha e mural na San Nicolas.

Art Fair lo ta dedica pa hubentud, Gang di Arte, arte di palabra, baile di hoben y musica. Pa diasabra lo ta dedica pa Aruba. “Musica, cuminda crioyo, custumber, arte y cultura local lo ta hunto den caya, cu lo tin bou nomber Caya Aruba, pa hende identifica”, Bolivar a splica.

Diadomingo lo ta dedica na diferente nacionalidad cu tin na Aruba. Mas di 30 nacionalidad lo duna presentacion di cantica, musica y cuminda. Lo integra 2 pais y haci un fiesta di arte ‘pa ataca guera y ta uni’.

Tambe Bolivar a duna di conoce cu pa prome biaha, Aruba lo tin 4 artista local cu lo percura pa otro mural. Lo tin artista internacional cu a trece un obra di arte 3D, cu ta yama ‘Optic augmentation or optical illusions’, na unda e persona ta mira algo, despues e ta mira algo diferente. E aña aki lo reconoce artista Elvis Tromp, kende tin mas di 50 aña dedicando na pintura.

Aruba Art Fair 2019 lo tuma luga dianan 22, 23 y 24 di november. Evento ta cuminsa 7or di anochi. “2019 lo marca apertura pa e prome lustro di 2020 cu ta culmina den remodernisacion di Hooiberg, na unda 600 trapi lo haya diseño di tur parti di mundo pa completa e obra mas grandi di Mosaic den Caribe.”

Tita Iglesias, di departamento di ATA Evento & Patrocinio, ta duna di conoce cu un evento asina ta importante pa comunidad y tur esunnan cu ta bishita Aruba, cu kier experiencia nos isla y cultura di otro forma.

E ta un forma cu por trece artista internacional. Asina mas bishitante por mira y sa cu Aruba no ta solamente lama, pero tambe cultura y por supuesto, arte. Di e forma aki tambe nan ta duna nan conseho na otro persona pa sigui bishita Aruba y experiencia arte, promoviendo di forma organico nos industria turistico.