Aruba Art Fair: Bunita exposicion pero malcontento bou artista

E evento artistico grandi pa ilumina San Nicolas, esta Aruba Art Fair cu participacion di 150 artista segun e organisacion, a habri awe. Sin duda un exposicion di diferente forma di arte riba un nivel halto. Sinembargo tin malcontento tambe bou di artista.

Un di kehonan ta cu tin un presupuesto pa e evento di un 1 miyon florin, pero e artistanan Rubiano mes no ta wordo paga pa nan trabou. Otro punto critico cu por scucha ta cu e organisacion no a haci suficiente esfuerso pa envolvi e habitantenan di San Nicolas. Tampoco scolnan y ni e doñonan di e edificionan bashi cu ta uza como espacionan pe exposicion di e arte.

Aunke hopi ta sinti cu e intencion pa duna San Nicolas un empuhe extra, transformando e ciudad den un ciudad di cultura y manera bisa e arte mes ta di un nivel halto, e ta un lastima cu esaki no a trece e union y siguramente e aprecio pa e artistanan local.

No ta prome biaha cu ta invita artistanan local pa participa na eventonan unda tambe tin presencia di artistanan internacional, pero no ta balora nan den e mesun forma. Manera e iniciativa (cu placa priva) den cuadro di e grabacion di nos Himno na New York. Unda nan a paga e orkesta Mericano si pero e musiconan Rubiano no.

E evento di Aruba Art Fair tin su meta tambe, segun e organisacion, pa unifica e artistanan riba diferente disciplina. Bon Dia Aruba lo trece e puntonan di critico dilanti na e organisacion pa asina haya nan banda di medaya.