Aruba Aloe ta retira algun producto for di mercado na Merca pa presencia di methanol

Recientemente, diferente medio di comunicacion internacional a publica e noticia cu e oficina di FDA na Merca a anuncia cu 40 lote di Aruba Aloe Hand Sanitizer Gel Alcohol 80% y Aruba Aloe Alcoholada Gel, cu ta wordo bendi na Merca, a wordo retira boluntariamente despues di a descubri methanol den e productonan.

Exposicion substancial na methanol, un alcohol toxico cu generalmente ta ser haya den antifreeze y likido pa limpiesa di bentana, por causa nausea, sacamento, dolor di cabez, problema cu bista, coma, convulsion, daño na e sistema nervioso central of morto, e compania cu ta basa na Aruba a indica den un anuncio publica door di e Food and Drug Administration (FDA).

Esnan cu ta usa e producto retira riba nan man ta coriendo peliger, mientras cu muchanan cu por bebe nan accidentalmente y hendenan mayor cu por bebe nan como un sustituto di alcohol ta den mas peliger pa venenamento cu methanol, segun e compania.

E productonan retira ta inclui Aruba Aloe Hand Sanitizer Gel paketa den boter di plastic di contenido di 12 ons likido, di color berde scur cu e barcode 0 82252 03300 5.

Tambe ta retira e producto Aruba Aloe Alcoholada Gel den dos tamaño: boter di plastic cu un contenido di 2.2 ons likido cu e barcode 0 82252 34030 1 y boter di plastic cu un contenido di 8.5 ons likido cu e barcode 0 82252 03120 9.

Segun informacion di e compania e productonan retira a ser distribui entre 1 di mei 2021, y 27 di cotober 2023, y a ser bendi na Merca online a traves di e website di Aruba Aloe Balm. E compania ta notificando

consumidornan cu a cumpra e productonan via e-mail y ta ofrece un coupon di descuento pa un proximo compra. Esnan cu a cumpra e productonan retira mester benta nan afo.

FDA ta recomenda consumidornan pa stop di usa e productonan inmediatamente y ta urgi nan pa tuma contacto cu nan dokter of proveedor di cuido di salud si nan a/ta experiencia cualkier problema cu por ta relaciona cu uso di e productonan aki.

Te cu 5 di april, Aruba Aloe Balm N.V. no a ricibi ningun reportahe di incidente cu por ta relaciona cu e productonan aki, segun FDA.