Orguyosamente Aruba Airport Authority N.V. (AAA) a organisa diferente actividad pa promove y contribui na e Siman di Accion Global di SDG 2024 di Nacionnan Uni (UN).
E tema di Sustainable Development Goals (SDGs) Action Week 2024 p’e aña aki ta “Lead the Way/ Lidera e Caminda”, caminda liderazgo sostenibel pa progreso transformativo ta inclui hende, organisacion y compania. Durante e siman di 19 di september pa 25 di september 2024, Nacionnan Uni y demas partner mundial a aumenta e compromiso y accion rond mundo riba e 17 Metanan di Desaroyo Sostenibel.
AAA a prepara un programa pa SDG Action Week 2024 cu a enfoca riba fortalece su esfuersonan pa medio di colaboracion cu tanto partner local como internacional cu ta contribui na diferente SDG. E siman a inicia cu un presentacion di Fundacion Contra Violencia Relacional (FCVR) riba Promociona Relacionnan Saludabel- combatiendo violencia domestico. E siguiente dia a consisti di dos training di introduccion y conscientisacion di Sunflower Hidden Disabilities Program p’e personal di AAA y e comunidad di aeropuerto facilita pa Health and Wellness Coordinator di AAA den preparacion pa e lansamento oficial cu lo tuma luga na luna di october. Como parti di World Beach Cleanup Day, a organisa un limpiesa rond di lama conhuntamente cu Tropical Bottling Company na Grapefield Beach, San Nicolas, cu a consisti di un total di 130 participante combina. Pa conclui cu SDG Action Week, riba dia 25 di september a tuma luga e hisamento di e bandera oficial di SDG den presencia di personal di AAA y comunidad di aeropuerto.
“AAA ta sigui promove SDG di Nacionnan Uni dentro di AAA y bou di e comunidad di aeropuerto y ta curasha participacion activo den e actividadnan cu ta contribui positivamente na e metanan global aki. Como cu e tema di e aña aki tabata Lead the Way, nos ta kere firmemente cu door di organisa tipo di actividad y iniciativa aki y crea partnership, nos ta un organisacion ehemplar tanto pa comunidad local como tambe pa esnan internacional y ta spera di por impacta positivamente y curasha e otronan pa haci mescos”, asina Christine Kaarsbaan-Leo, Sustainability & Health Manager di Aeropuerto di Aruba a duna di conoce.
Tocante AUA Airport
AUA Airport ta un di e aeropuertonan mas ocupa den region Caribe, cu mas di 25 diferente aerolinea operando na Aruba contribuyendo na casi 3 miyon pasahero pa aña y brindando servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 77% ta di Merca y Canada, 15% ta di Latino America, 4% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu e instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta pasando na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport.
