“Manera a indica na october 2020, cada kwartaal nos lo actualisa nos pronostico di varios aña. Den e prome kwartaal di 2021 nos ta mira un recuperacion mas slow di loke nos a premira na october pa e añanan nos dilanti. Nos ta sigui den contacto diario cu nos partnernan den e industria di aviacion y turismo pa adapta y cambia nos pronostico(nan) si ta necesario. E pronostico aki ta basa riba tur informacion cu nos tin te cu awe. E pronostico di varios aña ta keda fluido y nos lo keda haci nos maximo esfuerso pa yuda Aruba den su recuperacion necesario,” asina Joost Meijs, CEO di Aruba Airport Authority N.V. (AAA)a indica.
Na final di 2020 Aeropuerto di Aruba ta spera di a procesa aproximadamente 430,000 Revenue Generating Passengers (RGP) (e cantidad final lo bira conoci den e siman nos dilanti). Esaki lo nifica un recuperacion di 34porciento di RGP cu a wordo procesa na Aeropuerto di Aruba na 2019.Basa riba e network cu Aeropuerto di Aruba su aerolineanan partner y basa riba informacion ricibi for di asociacionnan di e industria di aviacion (IATA, ACI, ICAO, etc.)Aeropuerto di Aruba a determina su pronostico actualisa pa e añanan na caminda pa loke ta e cantidad di pasahero cu lo sali for di Aeropuerto di Aruba (Revenue Generating Passengers).
Manera por mira, Aeropuerto di Aruba ta calcula na e momento aki cu lo recupera 34 porciento na 2020, 46 porciento na 2021, 68 porciento na 2022, 78 porciento na 2023,84 porciento na 2024 y 90 porciento na 2025. Esaki ta nifica cu Aeropuerto di Aruba a ahusta su pronostico pa 2020 for di 37 porciento di recuperacion pa 34 porciento di recuperacion. Pa aña 2021 esaki a wordo ahusta for di 52 porciento di recuperacion pa awo 46 porciento di recuperacion. Pa e resto di añanan Aeropuerto di Aruba ta keda positivo cu lo alcansa e porcentahenan di recuperacion indica den comparacion cu 2019. E ultimo lo sigui cambia manera e añanan ta acercando y Aeropuerto di Aruba tin miho bista riba e airlift pa e añanan ey.
