ORANJESTAD – Segun algun medio di comunicacion, y tambe segun algun funcionario di Aruba Airlines cu Bon Dia Aruba a consulta, e compania ta pasando den momentonan dificil. Esaki ta principalmente pa e decision di gobierno Venezolano luna pasa di cera frontera entre e pais y e islanan ABC, incluyendo pa trafico aereo.
E situacion aki a conduci na problema pa sigui bende e ruta lucrativo di Caracas – Aruba – Miami, unda e pasaheronan Venezolano tabata cumpra nan ticket pa Miami aki, pagando aki tambe. Asina tabata evita e problemanan cu anteriormente varios compania tabatin, entre nan Tiara Air y Insel Air, di bende ticket na Venezuela pa despues haya e problema cu gobierno Venezolano cu no tabata entrega e placa aki, y sigur no den divisa convertible, loke a contribui grandemente na nan bancarota.
Ultimamente a presenta un alternativa cu no a continua. Segun e website bizjournals.com, e aeropuerto di Tampa tabatin pensa pa cera un convenio cu Aruba Airlines pa tuma over un servicio existente di vuelo entre Tampa y Cuba. Southwest Airlines tabata e principal carrier desde 2016 entre Tampa y Havana, pero Southwest a cambia su plannan pa concentra riba ruta pa Hawai, habriendo e posibilidad pa otro aerolinea. Sin embargo, e convenio no a resulta, a pesar di pasonan huridico pa purba logra esaki.
Aruba Airlines por lo tanto su operacion ta limita actualmente na e servicio aereo entre e islanan ABC, loke no ta un base suficiente pa utilisa e recursonan actual. E problemanan no ta concerni, en todo caso, na e trafico entre e islanan ABC.
