For di fuentenan fidedigno Bon Dia Aruba a haya informacion cu e compania di aviacion Arubaanse Luchtvaart Maatschappij NV (Aruba Airlines) ta den problema financiero grandi. Ya hopi prome cu e virus di Covid-19 a sali for di Wuhan, Aruba Airlines tabata operando na un manera peculiar pa un aerolinea di Aruba.
Su sobrevivencia tabata bin di vuelonan charter entre Miami y Cuba, despues entre Guyana y Cuba, Nicaragua y Cuba. Esaki hasta a hiba na incidente cu ciudadanonan Cubano cu a keda expulsa di nan pais y poni riba vuelo di Aruba Airlines, segun denuncia di organisacionnan di exiliado Cubano na Merca. Aruba cu ta su sede legal y supuesto base di operacion tabata e punto unda cu menos frecuencia e tabata toca tera.
Cu e pandemia den ultimo lunanan e vuelonan charter aki tambe lo a para. Consecuentemente no por a paga huur di e avionnan y un di e avionnan hasta lo a keda para na aeropuerto na Cuba. E jet chikito a keda Aruba cu, mientras e frontera entre e islanan ABC tabata habri, tabata bula. Sin embargo ora esaki tambe no tabata posible mas, e jet aki a keda para na aeropuerto Reina Beatrix.
Segun e fuentenan ta danki na Fase cu e trahadornan a haya parti di nan salario pa e lunanan reciente.
Tambe lo tabatin un incidente cu e jet na aeropuerto ora un mecanico a bay laba e avion. Mester a hiba jet Merca pa drecha y e doño a pidi e avion back, principalmente pasobra e compania lo no tabata paga e lease. Ademas lo no tabatin placa mas pa haci mantencion tampoco
Di e manera aki pa algun luna Aruba Airlines lo ta un compania sin avion, y ta bin acerca cu e compania mester a sali for di e edificio di Codemsa, ya cu segun e fuentenan no lo tabata pagando huur. E mueblenan lo a bay den deposito na un edificio di un compania y documentonan lo a bay na un lugar desconoci.
Si dado momento no tin placa mas pa Fase, e empleadonan lo por haya solamente cesantia, si tin un caso di bancarota oficial. Den e caso ey SVb lo ta paga e cesantia. No ta conoci cu e compania ta dispone di otro bienes na Aruba, cu excepcion di su mueblenan si nan ta dispone di nan ainda, segun nos informantenan.
Segun e fuentenan lo tin bastante acreedor di e compania cu ta core riesgo di no haya nada. Esaki lo ta encera gobierno tambe, den forma di impuesto y pagonan di prima di AZV y SVb, fuera di e relacionnan comercial y e empleadonan.
Den e situacion aki Aruba Airlines dificilmente lo tin placa pa paga tur su debenan, pues e trahadornan lo mester busca caminda pa corte pa un decision cu lo por duna nan derecho riba cesantia.
Redaccion a purba di tuma contacto cu un representante di Aruba Airlines pero esey no a logra. E website di e compania ta den ‘maintenance’.
Potret: Jetphotos.
