Aruba Airline a inaugura su vuelo pa Boneiro diaranson. Nan lo bula 4 biaha. Tambe a yega un acuerdo pa transportacion medico.
Durante e conferencia di prensa a wordo bisa cu Aruba Airlines y e seguro di Cuido ZVK a yega na un acuerdo pa asina manda pashentnan Aruba pa cuido medico, cual lo sosode 2 bes pa siman. Cuminsando awe 1 december Angel Bermudez lo bira hefe nobo di ZVK tambe. Sr. Bermudez tabata minister di Financia di Aruba.
Pa e vuelo inaugural tanto prensa como minister Transporte di Aruba Chris Romero a wordo invita. Na yegada na Boneiro tur e invitadonan a wordo cordialmente ricibi pa Gezaghebber Edison Rijna, pa despues bay na e restaurant situa na Rincon Posada Para Mira. Aki ta unda e ehecutivonan di Aruba Airline a splica e motibo pa e vuelo aki.
Gerente Fransisco Arends ta splica cu nan lo tin cuater vuelo pa siman di cual e dianan lo ta diamars, diahuebs, diasabra y diadomingo. Tres di e vuelonan aki lo bay via Curaçao y esun di diadomingo lo bay direct pa Boneiro. Sr. Arends ta bisa e tarifa di e vuelonan aki lo ta 315 florin pa un round trip di Aruba, Boneiro, Aruba. Esaki ta inclui tax di Boneiro y no di Aruba. E avion ta un jet T cu tin luga pa 50 pasahero.
Sr. Arends ta bisa cu pa motibo di tarifa halto y tabata tin mester di un otro aerolinea mas pa alivio pa e hendenan di Boneiro y visa versa pa biaha mas economico. Minister di Transporte Romero tambe a hiba palabra na unda e ta bisa cu e ta contento pa motibo cu awo e pueblo di Aruba y Boneiro sigur tabata warda riba esaki. E mandatario ta bisa cu awe a realisa un otro conexion entre e islanan cu ta beneficia e ambos pais y cu esaki por haci cu negoshinan entre e dos islanan lo por traha mas cerca cu otro.
