Aruba Airlines lo posiblemente ta drentando un situacion fastioso mirando e embargo tuma pa gobierno di Venezuela. E aerolinea ta conta cu mas cu 100 mil turista di nos pais bisiña segun Chris Romero minister di transporte (MEP). Alabes manera ta conoci Insel Aruba a bay bancarota y parce cu Insel Corsou no ta canando mucho miho.

E dos aerolinea ta sumamente importante pa e conexion entre e islanan. Fin di aña pasa Aruba Airlines a cuminsa bula bek riba Corsou entre otro, unda por mira un efecto positivo riba e prijs di ticket y e disponibilidad di vuelonan. Prome cu esaki e trafico aereo entre Aruba y Corsou tabata sufriendo como cu Insel tabata e unico compania cu tabata bula entre e dos isla y riba su mes tabata tin problema grandi (tecnico) cu su avionnan.

 Awor Insel atrobe mester a cancela hopi vuelonan. Segun fuente bonaire.nu e cancelacionnan di Insel di cual Bon Dia Aruba tambe a publica ayera, ta debi na falta di placa pa mantene e avionnan. Asina cu solamente 1 avion ta bula pero cu tambe ta parce ta insigur pa cuanto tempo esaki ta.

Nos a purba haya mas claridad riba e situacion cu Insel na Corsou ta aden actualmente pero nos no a logra haya contacto ni cu representantenan di e aerolinea ni cu autoridadnan di Corsou, mirando cu anteriormente nan tabata inverti den e aerolinea pa asina e por sigui opera. Na e number general di Insel nos no a haya niun informacion. Aunke Insel na Corsou ta pasando den situacion dificil, e periodo aki pa Insel Aruba a pasa caba.

Manera minister encarga cu transporte a confirma, Insel Aruba a bay failliet algun tempo atras. Ultimo por a tuma nota cu e compania tabata purbando na bende e permiso pa por opera na otro operado, pero esaki no a logra segun e minister.  “E permiso a caduca te hasta prome cu ami a tuma mando den parti di transporte.”

Aruba Airlines no a bati alarma te ainda
Ademas di e situacion cu e aerolinea aki ta enfrenta, posiblemente Aruba Airlines lo ta enfrentando dificultad despues cu presidente di Venezuela a extende e prohibicion di comunicacion aereo y maritimo entre nos pais bisiña y islanan ABC. Esaki mirando cu un gran parti di e vuelonan cu e aerolinea ta conta cu ne ta conecta cu nos pais bisiña. Segun mandatario sr. Romero, e trafico Venezolano cu e aerolinea tabata conta cu ne regularmente tabata bay te cantidadnan di 100 mil turista. Sinembargo e mandatario a declara na e matutino aki cu te ainda Aruba Airlines no a bati alarma pa loke ta trata e embargo cu ta stop nan di bula pa Venezuela pa tempo indefini. “Mi no a haya ningun corespondencia cu por indica cu nan ta mirando un problema pa nan por sigui opera.”

Sr. Romero a expresa cu si yega asina leu cu e aerolinea wordo afecta gravemente gobierno di Aruba lo mira tur e posibilidadnan cu tin pa duna un man. “E situacion actual no a cambia mucho hopi pero e embargo sigur ta haci algun cos mas dificil”.

Nos a purba haya contacto cu Aruba Airlines pero nos no a logra haya ningun contesta di un persona cu por papia pa e compania. Nos lo sigui e desaroyonan aki di cerca pa sa si ya caba e aerolinea ta observando un situacion dificil of si ta premira cu lo bay pasa den algo asina.

Debenan di gobierno Venezolano
Venezuela debe ainda tanto Aruba Airlines como Insel Air miyones. E debenan aki cu nos pais bisiña tin cu Aruba Airlines y Insel Air te awo no a wordo reanuda. Pero te hasta e Tiara Air a haya problema cu esaki Esaki e mandatario a indica cu tabata un factor cu a hunga rol pa Tiara a bay failliet.