Nos ta varios dia y varios comunicado di prensa mas leu, pero no por bisa cu a bin mas claridad den e relacion entre gobierno di Aruba y gobierno Hulandes pa loke ta e asunto di supervision financiero. E prome contradiccion a surgi ora cu nos prome ministro a anuncia, cu cierto alivio visible, cu gobierno di Aruba no a haya un ‘KB’ diabierna pasa, y cu awor Aruba por sigui traha mas trankil riba preparacion di e ‘Begrotingskamer’ di Aruba, cu lo bira, den vision di e gabinete, e organo di control riba finanzas publico local, sin intromision di Hulanda o di Reino.

Na Hulanda, y saliendo di e reunion di Conseho di Ministro di Reino, secretario Raymond Knops ta anuncia cu e absolutamente no ta contento, y ta referi specificamente na e situacion di e ley local di supervision (LAft) cu a keda ‘machica’ pa e fraccionnan cu ta sostene gobierno den parlamento di Aruba. E ta bisa cu e ta keda haya esey inaceptable y ta referi na e proximo fecha pa e proximo reunion di Conseho di Ministro di Reino, 18 di october, unda segun Knops Aruba lo mester presenta su plan con pa duna e acuerdonan di e protocol su concretisacion den ley. E ta bisa acerca cu tin diferente posibilidad pa esaki, pero no ta amplia riba esakinan.

E reaccion di nos prome ministro ta cu e no sa nada di e acuerdo supuestamente haci den e reunion, unda su ministro plenipotenciario tabata presente. En todo caso, su ponencia ta cu tal palabracion no ta existi. Seguidamente ta bin e informacion cu e mester bay consulta cu prome ministro Hulandes Rutte, cu mescos cune ta actualmente na New York pa Asamblea General di Nacionnan Uni.

Den e edicion aki por haya e ultimo comunicado di prensa di prome ministro, unda e ta anuncia cu CAft a propone na Gobierno di Reino un ‘aanwijzing’ pa Aruba, loke ‘felizmente’ no a tuma lugar, nos mester comprende. Honestamente, ningun hende mester desea Aruba esey, nos tampoco. Pero ora nos ta mira cierto tendencia cu ta bay den direccion di un instruccion di Reino, nos mester señala esey. Y pa ta franco, nos no ta kere cu e asunto di e presupuesto 2019 ta esun mas problematico. CAft ta haci su trabao y ta señala cu mantene cierto gasto pafo di presupuesto ta kibra e proposito di yega na un presupuesto, y gasto durante aña, responsable y balansa. No por ta asina cu ta presenta presupuesto y despues ta bin cu otro gasto cu ta keda un banda; esey simplemente no ta serio, ni cuanto grita y lamenta cu e crisis social ta asina grave.

Pero, tur esaki ta nada mas cu desvia atencion di e problema mas grave cu mester atende, y esey ta e asunto di e ley machica. Pa bolbe na e entrevista radial di Knops di diabierna pasa, e hecho cu gobierno di Aruba a manda un carta pa parlamento bisando cu no ta manda e ley, aproba pa parlamento, mas pa Gobernador firma, pa Knops no ta suficiente. Manera el a declara, na cualkier momento gobierno por bira mand’e toch pa Gobernador, creando e siguiente problema. Naturalmente aki Knops ta expresa desconfiansa den gobierno di Aruba, y nos no ta haya esey asina straño di su banda. Nan a mira tur e maniobranan desde november aña pasa te awe, unda a palabra y firma un protocol cu gobierno di Aruba, pa despues bin ripara cu, aparentemente den comun acuerdo cu e fraccion grandi gubernamental, yega na un proyecto di ley cu lo a haya e famoso amienda pa machica e supervision Hulandes. E storianan cu nos a haya di tende cu parlamento ta un poder estatal riba su mes y ademas ta e ‘organo mas halto’ den nos sistema democratico, y cu no por stroba nan den nan afan pa ‘coregi’ e ley cu en berdad no mester tabat’ey, no tabata algo cu e fraccion a haci riba su mes. E sonrisa durante e tratamento riba cara di e mandatarionan concerni tabata demasiado obvio. Ademas, nan a desconseha e amienda aki, loke lo tabata logico for di nan posicion, igualmente ‘independiente’ como poder ehecutivo, confirmando e principio di ‘trias politica’? No, y awor a bin e ‘backlash’ di henter e maniobra aki, cu naturalmente nan ta purba suavisa bisando cu pa bienestar di pueblo ta bay di acuerdo cu gobierno no ta duna Gobernador e ley pa firma, cabando cune nan mes. Pica si di tur e oranan dedica na algo cu di antemano nos a yama un esfuerso inutil. Pero enfin, nos no ta consehero di gobierno, ni di parlamento.

Contal cu awor nos ta na porta di october, y tin hopi trabao pa haci. Mester contene gasto mas tanto posible pa e aña coriente, mester presupuesto pa 2020, sin cu ta mira un rumbo pa e reforma fiscal, pero ta keda tambe e tarea di caba di regla e base legal pa e supervision acorda den e protocol di november 2018. Tin dos manera so: pasa un proyecto di ley na Aruba, cu solamente e cambionan acorda den e protocol, o laga Reino dicidi kico ta haci. E bala ta keto bay riba cancha di Aruba.