Aruba a ta alcansa 2,109 caso activo pa Covid-19

Ayera Gobierno di Aruba a ofrece un conferencia di prensa pa asina informa comunidad tocante e situacion cu Aruba ta bibando na e momentonan aki, prome minister Evelyn Wever-Croes a splica cu nan ta calcula cu e casonan activo pa Covid-19 por yega na 2.000 den proximo dianan aki ora lo cuminsa aña 2022, un cifra cu segun rapport di ayera a ser surpasa caba.

“Nos ta den e di cinco ola na unda nos ta surpasando e otro olanan, sinembargo, si bo ta mira con e ola cinco aki ta weitando por mira cu Omicron ta tumando luga na Aruba y nos ta preocupa, pero esey no ta motibo pa panico”, el a sigura.

Ademas, el a trece dilanti cu casonan positivo pa Omicron ta uno menos severo y esey ta nifica menos hospitalisacion na hospital, tambe e ta keda ‘aparentemente’ menos dia activo, na unda cu compara cu variante Delta tabata esun cu a haci mas daño na Aruba cu hopi mas hospitalisacion y cu si e tendencia ta sigui e mesun caminda aki den un dia por registra e tripel di casonan cu a registra cu variante Delta loke por pone cu capacidad den hospital lo por yena hopi lihe.

“E problema no ta solamente cama, e problema ta personal, generalmente na Aruba na e momentonan aki caba varios doño di trabou ta experenciando cu hopi trahado ta sali positivo y mester bay den isolacion of cuarentena loke ta paralisando operacionnan”, prome minister a bisa.

Pa evita di yega na e punto ey el a enfatisa cu nan no ta bay implementa medidanan extremo como un toque de queda of un lockdown, pero si lo tuma cierto pasonan pa disminui e riesgo, e cambionan cu lo drenta na vigor for di mañan 30 di december ta cuminsa na HORECA cu lo tin un orario di ciere di 12or di anochi pa establecimentonan y 1or di marduga pa Casinonan, restaurantnan mester tin maximo 6 persona na mesa, rumshop cu maximo 4 persona na mesa, entretenimento cu un performance di maximo 5 persona.

Encuentronan social of familiar cu maximo 60 persona paden y 75 persona pafo.

Pa loke ta trata tiramento di pagara comerciantenan por tira pagara te 12or di merdia di 31 di december, despues di e ora ey no ta permiti.

Pa tiendanan, 1 persona so pa famia por haci compra utilisando garoshi of macuto, deporte lo por continua pero sin publico y entiero por maximalisa na 75 persona solamente.

Aparte di e medidanan aki, prome minister a expresa cu tin cierto recomendacionnan na unda nan ta limita bishita di famia durante dianan di fiesta, usa tapaboca na tur momento, limita biahenan pa paisnan di riesgo halto of hopi halto.

Prome minister a anuncia tambe cu ora un residente lo bolbe back di su biahe pa Aruba nan mester haci e prueba na entrada, sea prome cu subi avion of na momento di yega Aruba.

Igualmente lo keda vigente e medidanan como samenscholingsverbord unda cu maximo 6 persona por ta hunto riba caya, gebiedsverbod ta cuminsa 7or di anochi y ta caba 5or di marduga, alcoholverbod ta 24 ora di dia na unda ta prohibi di tin alcohol riba caminda publico.

“CrisisTeam a tene na cuenta cu tur aspecto y nos ta kere cu esaki ta lo cual cu nos mester pa traha awor, e medidanan aki lo keda den efecto pa dos siman y nos ta reevalua constantemente con ta bayendo y si mester scala of descala”, prome minister a declara.

Asina mes, minister encarga cu Salud Publico Dangui Oduber a duna e cifranan di vacunacion na unda a afirma cu 12.525 persona a ricibi nan boostershoot caba na unda el a bisa cu pa yega na herd inmunity Aruba mester yega na 85% di e poblacion cu a ricibi e vacuna pero cu te ainda no a logra yega na e cifra aki, na e momentonan aki 62% so di comunidad a vacuna.

El a afirma cu ya nan a nota cu tin 100 cancelacion pa biahe pa Aruba cu a cuminsa drenta pa loke nan ta espera cu nan por baha e contagio hopi lihe pa asina Aruba por tin e temporada halto cu tabata wordo espera pa tur hende.

“Nos ta confrontando hopi reto logistico, tin retonan cu personal na hospital y tambe na acomodacion na momento cu turistanan ta test positivo, cu nan tin cu acomoda na otro luga mirando e cantidad de turistanan cu a test positivo e ultimo dianan aki cu a trece reto adicional cune pa acomoda nan cu no tin asina hopi luga”, Oduber a expresa.

Tambe el a trece dilanti e preocupacion di ciudadanonan cu tin tocante realisacion di test pa Covid-19 unda por a mira riba rednan social rijnan largo pa por haci e prueba aki, tocante esaki el a sigura cu e maneho semper tabata y ta dirigi solamente pa personanan cu tin sintomanan por haci e test.

“Mi ta convenci cu nos ta bay progresa despues di e cinco wave aki y cu positivismo nos tin cu habri aña 2022, no ta un situacion facil cu gobierno y CrisisTeam ta confrontando” minister Oduber a finalisa.

Cifranan di ayera 29 di december a relata cu Aruba a yega na 2109 caso activo, 667 caso registra e dia di ayera so na unda cu 580 ta residente y 87 ta no residente, na hospital no tin ningun persona den Unidad di Cuido Intensivo (ICU) y riba piso general tin 8. Na Colombia actualmente tin 3 persona den ICU y ningun riba piso general.