Ayera mainta durante un conferencia di prensa di gobierno, minister di Labor, Energia y Integracion, Glenbert Croes a elabora ariba diferente topico relaciona na Energia. Entre otro a anuncia cu Aruba a obtene un licencia di OFAC (Office of Foreigns Affair Control) pa cumpra Heavy Fuel Oil (HFO) Venezolano.

E mandatario a anuncia cu despues di un trayectoria cu a cuminsa na 2022, diabierna ultimo Aruba a ricibi e noticia cu e Departamento di Tesoro di Gobierno Mericano a aproba e solicitud cu el a realisa den nomber di Gobierno di Aruba pa haya un licencia como pais di OFAC.

Cu e licencia aki, el a splica, Aruba por haci operacionnan cu OFAC ta autorisa y e licencia a wordo solicita specificamente pa e compania Fuel Marketing & Supplies Aruba NV (FMSA) por cumpra HFO di origen Venezolano.

El a indica cu, mirando e specificacion y e prijs na cual Aruba por cumpra HFO for di Venezuela y teniendo na cuenta e cercania di Aruba cu Venezuela, e licencia aki ta brinda Aruba e oportunidad, tanten cu Aruba ta depende di HFO como e instrumento cardinal, pa por baha prijs di awa y coriente.

 

Minister Croes a sigui splica cu e licencia di OFAC ta valido pa un periodo di dos aña pasobra durante e periodo cu Aruba ta traha pa elimina HFO y haci e transicion pa gas natural na WEB, ta importante pa logra cambia pa un HFO mas limpi, na e formula acorda entre WEB NV y EAGLE LNG y e HFO di origen Venezolano aki ta cuadra cu e specificacionnan aki y alabes ta yuda Aruba yega na logra baha e prijs di awa y coriente.

Pa loke ta trata e peticion pa ricibi e licencia di OFAC, minister Croes a indica, Aruba a trece dilanti argumentonan importante pa por a haya esaki. Bon Dia Aruba a puntra e mandatario si por a elabora ariba e argumentonan aki.

Minister Croes a splica den su contesta cu Aruba a pidi e licencia di OFAC pa por cumpra Heavy Fuel Oil explicitamente pa uso domestico. Esaki ta nifica cu FMSA ta bay bende e HFO aki explicitamente cu WEB Aruba NV cu ta produci awa y coriente pa pueblo di Aruba.

“Nos no a pidi autorisacion pa nos cumpra Heavy Fuel Oil pa FMSA haci negoshi cune of bende pa otro hende. Explicitamente a pidi e permiso na Gobierno Mericano pa cumpra Heavy Fuel Oil di origen Venezolano pa nos suministr’e na WEB cu ta produci nos awa y coriente,” el a remarca.

Otro argumento cu e mandatario a menciona cu nan a trece dilanti den e peticion ta cu ta pidi pa por cumpra e HFO di Venezuela pa combati energy inflation (inflacion energetico) cual ta loke ta aumenta e prijs di awa y coriente.

Otro miembro di prensa a puntra e mandatario ki garantia tin den caso cu Merca dicidi di pone sancion atrobe riba Venezuela, cu e licencia aki no ta wordo blokia.

Minister Croes a splica cu na e momentonan aki caba tin sancion riba Venezuela y pasobra cu tin sancion imponi riba Venezuela, Aruba mester un licencia di OFAC pa por cumpra HFO for di nan. Si no tabatin sancion contra Venezuela, locual a sucede algun tempo pasa ora cu Merca a lanta e sancionnan pa seis luna, Aruba por a cumpra HFO for di Venezuela, pero ta hustamente pasobra cu Merca a implementa e sancionnan di nobo contra Venezuela, cualnan ta vigente te ainda, mester un licencia OFAC pa permiti cualkier pais of compania den casonan specifico cumpra toch for di Venezuela no obstante e sancionnan.

Kedando den e mesun topico di energia, Minister Croes a anuncia cu diabierna ultimo tambe Conseho di Minister a aproba su solicitud pa aprobacion pa e Compania Arubano di Petroleo y Armstrong Oil and Gas firma un acuerdo pa exploracion di gas y petroleo, cu enfasis riba gas.

E mandatario a splica cu den estudionan preliminar Armstrong Oil and Gas a identifica varios area rond Aruba cu lo por tin posibilidadnan di gas. El a indica cu e compania a identifica na e parti noord-oost di Aruba, totalmente opuesto na unda Repsol a bora den pasado, tres indicacion di posnan di gas cu un potencial igual na loke a wordo descubri na La Perla Venezuela.

Manera ta conoci Gobierno di Aruba ta trahando pa un transicion for di HFO pa gas natural cu ta energia mas limpi y menos contaminante. Mientras cu ta realisa e transicion aki, ta haci uso di HFO Venezolano. “Esaki ta un di e factornan instrumental cu ta bay yuda nos cumpli cu e meta di baha prijs di awa y coriente pa pueblo,” minister Croes a remarca.

Pa loke ta trata e tema di coriente y a cantidad di problemanan recien cu tin cu interupcionnan di coriente rond di e isla, e mandatario a indica cu e siman aki, pa ta exacto mañan diaranson, Utilities Aruba NV hunto cu MPR, cu ta e oficina di experto di Washington DC cu a bin haci investigacion na Elmar y cu ta continuando cu nan tareanan den asisti WEB, lo haci un presentacion ariba e resultadonan di e investigacion cu nan a realisa.

El a informa cu e indicacionnan preliminar ta señala cu tin hopi trabao pa haci y cu tur trabao mester wordo haci urgentemente y hopi di e trabaonan aki mester wordo haci simultaneamente tambe.

El a subraya cu gobierno di Aruba a duna luz berde na e companianan pa haci loke ta necesario pa restaura y rehabilita e infrastructura completo di produccion di awa y electricidad pa asina por tin un distribucion y suministro confiabel di e servicionan aki.

“Nos debe nos pueblo cara, nos debe nos pueblo cuenta y nos debe nos pueblo accion cu solucion den e henter e problematica aki di coriente,” el a resalta.

El a enfatisa cu e problemanan cu mester resolve ta grandi y cu mester resolve nan tur hunto. Pa e motibo aki, el a indica, a bin cu un mecanismo di solucion pa sigura cu tur e trabaonan aki ta wordo haci simultaneamente y cu e urgencia necesario pa cumpli cu e meta pa coriente y awa por wordo suministra di un forma confiable permanentemente.

Esaki, el a agrega, ta bay rekeri un inversion cuantioso, pero no a duna mas detaye ariba esaki.