E conferencia di e comision mundial Intergubernamental Oceonografico Caribe (OICARIBE) cu ta representa Latino America, Caribe y Merca ta un di e eventonan cientifico mas importante realisa na Aruba.

For di nos isla a bin un serie di recomendacion cu OICaribe ta trece dilanti pa e asamblea general di OIC na Paris na fin di juni venidero. For di e reunion macro aki, OIC lo bay traha pa henter mundo un maneho general pa e proximo añanan riba ciencia maritimo y otro factornan cu tin di haber cu lama.

E decision of recomendacionnan tabata varios. Un di nan cu Aruba mes a propone, ta relaciona cu un sistema di monitor y midimento pa coralnan, pa standarisa nan. E recomendacion di Aruba ta pa bin cu un metodo standard pa Caribe y henter mundo.

Marc Oduber kende a presidi e reunion aki a expresa palabra di danki na ministerio di enseñansa, ciencia y desaroyo sostenibel, tambe na e comision di Unesco Aruba bou maneho di su secretaria general Zetsia Ponson, y Reino Hulandes cu a yuda pa por a realisa e conferencia di e caliber aki exitosamente na Aruba. Oduber a keda satisfecho cu den e conferencia aki te hasta instancia local a haya software gratis pa monitor e presencia di Sargassum den nos direccion. Te hasta nan a haci un training na departamento di Naturalesa y Medio Ambiente despues.

“Nan ta actividadnan cu si bo no tin conferencia akinan, bo no lo haya nan,” el a bisa. Esaki ta e balor agrega cu e conferencia di OICaribe tabatin pa nos isla.

Hopi informacion a bin dilanti y door cu e conferencia a tuma luga na Aruba, nos tabatin e chens pa departamentonan gubernamental y hasta NGOnan por a atende e reunion aki. E tabata un bon scenario pa nan bin den contacto cu diferente experto di caliber di Nacionnan Uni of instancianan internacional pa nan por haya dato cientifico di actividad marino. Tambe minister Lampe ta evalua pa hinca e parti di ciencia di lama den curriculum di scolnan. E ta algo cu ta wordo haci na otro paisnan y –segun Oduber- ta importante cu Aruba, como isla rondona pa lama, ta hinca algo di ciencia marino den curriculum. OIC ta bay yuda nos pais con pa trece e informacion aki den scol.

Igualmente nan lo bin cu diferente publicacion elabora pa cientifico maritimo y/of representante di IOC por trece informacion dilanti pa comunidad, pero tambe universidadnan, NGO’s y tambe pa e clase politico pa nan ta consciente di e problema cu tin di haber cu lama, posibel solucion y ki sorto di decision mester tuma na nivel politico pa atende nan.

Mas cu 45 experto y representante di mas di 14 pais a delibera den e congreso aki. Tambe tabatin diferente representante di organisacion no gubernamental di Aruba cu a participa, manera fundacion Rancho, Comision di Medio Ambiente di Ahata, Centro di Pesca Hadicurari, Parke Nacional Arikok. OICaribe a eligi un directiva nobo presidi awor pa Arnulfo Sanchez di Panama, unda e proximo reunion lo tuma luga na 2021. Marc Oduber a wordo reeligi e biaha aki como vice-presidente di Caribe.