DEN HAAG – Diasabra ultimo un delegacion di gabinete di minister plenipotenciario a pone un krans na e monumento na Waalsdorpervlakte ariba “Dodenherdenking”. Tambe presente tabata director di Arubahuis Glenn Ling, sobrino di Boy Ecury Peter y su yiu Robbert Ecury y mentor Shahaira Brokke y Solange Quandus.

Prome cu esaki a tuma luga un encuentro na Cas di Aruba. Sr. Ling a yama e publico presente bon bini na Arubahuis y a disculpa minister plenipotenciario Guillfred Besaril cu no por ta presenta awe tardi aki nan, debi cu sr. Besaril lo pone un krans awe nochi den nomber di Conseho di Minister di Reino na e dam na Amsterdam.

‘Cada aña nos ta contento pa mira e repuesta positivo riba nos invitacion pa conmemora Dodenherdenking na Waalsdorpervlakte. Nos ta bin ta haci esaki pa hopi aña caba pa conscientisa nos hobennan tocante segunda guera mundial y kico esaki a nifica pa hopi hende. Miyones di hende no por rebiba e dia aki, pasobra sea nan a wordo ehecuta door di e nazinan den camponan di concentracion of sea nan a perde nan pida luchando pa libertad, pa democracia y pa husticia. Un di e personanan aki ta e hoben Arubano Boy Ecury, cu tempo cu e Alemannan a ocupa Hulanda, a join resistencia pa bringa e inhusticia aki. Boy Ecury facilmente por a scoge pa regresa su isla natal, sinembargo a tuma e curashi pa bringa contra di e nazinan. Pagando un prijs hopi halto pa esaki, cu ta su mesun bida.’
‘Riba 6 di november 1944 Boy Ecury a keda fusila pa e Alemannan na Waalsdorpervlakte.
E mesun luga cu aki rato nos ta pone un krans na memoria di Boy Ecury y tur esunnan cu a perde nan bida luchando pa libertad di Hulanda. E aña aki ta haci 75 aña di fayecimento di Boy Ecury. Un momento pa refleha riba su lucha y cu nos awe na 2019 por biba den un mundo liber. No ta tur pais na mundo por bisa esaki. Aki na Hulanda y tambe na Aruba nos ta liber pa duna nos opinion, expresa nos mes den un mundo democratico y ta gosa di libertad di prensa.’

Despues di su discurso e programa a continua cu presentacion di tres video cortico di tres Arubano cu a experencia segundo guera mundial na Aruba.

Na e monumento na Waalsdorpervlakte e delegacion Arubiano a pone un krans den nomber di gobierno di Aruba.