Aruba a perde… Bataya cu Covid…?

Presion ta subiendo, di tur banda. Nos ta observa tur dia e cifranan di caso di Covid-19, y ta alivia ora mira cu esakinan tin tendencia di baha. Pero naturalmente nos a bira mas cauteloso pa duna un opinion firme, pasobra nos a mira anteriormente caba cu un giro den direccion robez ta mas cu posible. Ademas, nos no por ignora cu e epidemia localmente a bira di otro caracter; ta trata di contagio den comunidad, unda gran parti ta tuma lugar via contagio den famia y na pia di trabao.

Tambe mester tuma na cuenta cu esaki ta un bataya cu nos no por perde, aunke nos a tuma nota di e encuesta di un medio di comunicacion, unda un gran mayoria di e esnan entrevista ta opina cu “Aruba a perde e bataya caba”. Aki ta importante pa separa algun cos. Cu mayoria di hende ta pensa esey, cu nos a perde e bataya contra Covid-19 caba, nos por kere esey, den sentido cu hasta un mayoria di e poblacion ta pensa asina. Y si nan ta referi na e hecho cu e virus a plama caba riba henter e isla y ta exigi un otro plan di guera pa combatie, nos por ta di acuerdo.

Di otro banda, e conclusion ey no ta haci cu e bataya contra e virus no ta sigui, al contrario. Nos mester sigui cu e lucha, pasobra ta importante pa limita efecto di e pandemia localmente mas tanto posible, pasobra haci algo otro no ta un opcion. Esaki no ta e situacion cerca nos so, sino ta experiencia na tur parti di mundo. Haci nada lo implica cu nos ta laga un grupo grandi di nos hendenan desampara, cu consecuencia fatal den hopi caso. Por lo tanto, continuacion di e lucha medico ta sigui sin tregua, unda felizmente por conta tambe di apoyo di exterior, principalmente di Hulanda. Ta bon pa mira cu e controversia na nivel politico tocante e ayudo financiero no ta stroba e colaboracion cu ta tumando lugar den e lucha medico. Asina mester ta tambe.

Pero nos no mester hiba e lucha medico cu tur loke nos tin pa e lucha aki riba su mes. Perde e bataya aki ta significa cu nos ta obliga di pospone inicio di nos recuperacion economico, y esaki pa motibo obvio. Manera semper, nos ta depende di otronan pa nos por tin un economia di un cierto volumen. Nos ta den e ‘core business’ di invita hende bin pasa algun dia o siman cerca nos. Pa nan bolbe lo mester sucede mas cu nos simplemente ta declara cu nos ta cla pa ricibi nan. Aki nos por mira cu e perspectivanan no ta asina bon. Merca a caba di pasa e marca tristo di 200.000 morto, y ta anticipa cu pa fin di aña e cifra ey por duplica… Na e momento aki tin casi trinta estado Mericano cu tin tendencia creciente den cantidad di caso activo. Y como cu e maneho di e crisis di virus mes a bira obheto di politica, mihor bisa politiqueria, mitar di e pais ta bisti tapaboca mientras e otro banda ta grita, igual cu nan lider, cu esey no mester. Ta un alivio pa mira en todo caso nos ta haci un mihor papel colectivamente, pasobra sikiera nos a keda libra di e tipo di discusion inutil aki. Contal cu e controversia Mericano ta sumamente importante pa nos, den sentido negativo, pasobra cada vez nos ta mira recuperacion di nos partner economico move bay mas den futuro, sin cu nos tin un gara riba esaki.

E pregunta clave na e momento aki ta, kico nos mester haci? Prioridad number un no ta asina dificil: nos mester vence e virus aki. Sin duda algun lo bin discusion tocante con mester haci esaki y lo bin sugerencia dilanti con pa cambia maneho pa nos ta mas efectivo. Un di e puntonan unda nos ta mira posibilidad di mehora ta den e informacion cu ta duna hende cu ta resulta positivo y mester atende un situacion na cas cu por ta bastante complica. Aki ta unda cu, di loke nos ta observa y tende di diferente hende, falta bastante. E ta cuminza cu cos simple manera bisa hende ‘cu nan mester bay den cuarentena’. Esey ta zona basta clarito, pero tin hende cu un mey aña pasa no tabata ni conoce e palabra, te pa nan sa exactamente kico pa haci pa evita cu den seno di famia e situacion ta bay di mal en peor, cu e resultado cu nos tin awor cu gran parti di e contagionan ta tuma lugar den famia. Por lo tanto e solucion lo mester ser busca ey tambe, igualmente e situacion na trabao. Ademas, nan situacion na cas por ta tal cu nan no por crea un ambiente sigur pa un caso positivo, y de paso protege e resto di e famia. Ta pesey na otro pais a crea posibilidad pa concentra hende cu tin Covid y saca nan for di comunidad, pero nos ta kere cu no ta necesario? Cu keto bay mas di mil caso activo diariamente, nos ta logra contene y controla e virus, wardando riba ken ta bira malo pa trata nan?Nos por gana e bataya ainda, pero mester adapta nos metodo.