Ayera mainta, Aruba a haya e gran Soft Opening di Watty Vos Boulevard, 25 kilometer di caminda nobo y algun cu a renoba, tambe tin areanan dirigi pa ciclistanan y personanan cu kier cana riba dje.

Durante e apertura tabata presente Minister di Infrastrustura Otmar Oduber, hunto cu Marlon Croes Director di DOW y Joao Campos di Mota Engil. Nan a ofrece algun palabra di gradicimento y apoyo pa tur persona envolvi den e proyecto, cu a keda disponibel pa comunidad di Aruba, pero cu ainda falta e parti di embeyecemento di e areanan.

Oduber a expresa cu esaki tabata ‘un di e tareanan mas dificil y un di e retonan mas grandi den dos aña como Minister di Infrastructura’. Di mesun manera, el a comenta cu esaki ta un proyecto cu tabatin hopi reto pa departamento di DOW, cu durante e ultimo dos aña y mey tabata yuda den e proceso pa por habri un avenida asina importante.

Tocante e garantia di construccion di e proyecto aki, Oduber a manifesta cu esaki ta un producto cu na final hende lo haya sumamente positivo y conforme cu e contract cu nan tabatin. Manera el a bisa, ‘e camindanan ta safe pa tur automobilista, e ta wordo habri y den periodo di tres pa cuatro luna e lo keda completamente cla, y ta bay wordo manteni pa 20 aña’.

Riba esaki, Oduber a señala cu trabounan di decoracion, landscaping, matanan, drechamento di stupinan lo cuminsa tuma luga. E legonan di e rotonde tin un funcion pa trucknan grandi cu tin cu pasa e rotonde, pa nan no bula riba acera. Tin cos cu a wordo drecha cu ta completamente sigur y a ricibi un certificacion. Tambe a sigura cu esaki ta un proyecto cu pa mas di 40 aña a cuminsa planifica y den ultimo 25 aña su ehecucion a inicia.

Tocante e mapa cu e proyecto aki tabatin desde su comienso, ora Minister Oduber no tabatin e funcion di Minister di Infrastructura compara cu esun di awendia, el a manifesta cu e diferencia ta hopi grandi, pa motibo cu e diseño ta algo, pero nan a percura pa nan haya loke nan a contrata cu e compania. E proyecto aki tabatin hopi adaptacion, camindanan adicional cu a wordo asfalta, otronan cu no tabata den plan, a cambia cierto rotondenan pa siguridad den trafico.

Tambe Oduber a splica cu a instala un comision cu ta bay involucra un grupo di trabou, pa adapta e camindanan cu varios tipo di matanan. Tambe cierto detayenan cu rotonde lo tin pa decora completamente henter e ruta.

Oduber a sigura cu a pone fondonan adicional durante e dos ultimo aña, pa motibo cu nan mester haya mas sosten for di Grand Thorton, cu ta un di stakeholder di e proyecto y asina sigura cu e proyecto no tabatin ‘mancamento’, manera e mes a expresa.

Tocante tur e rotondenan cu a construi, Oduber a bisa cu tur di nan ta habri caba y ta falta un so, esun cu ta keda dilanti di stadion Frans Figaroa, cu ta keda pendiente pa motibonan di algun calculacion robes cu a tuma luga di ambos partido y lo bay coregi esey. Pero pa loke ta trata Watty Vos Boulevard, e camindanan a keda totalmente habri cu iluminacion inclui.

Di loke ta trata e brug ubica na caminda di ex Codemsa, den ultimo dianan hopi hende a keha di e saconan cu tin aden y cu no ta un brug sigur. Oduber a contesta cu esey no ta berdad, esaki ta un brug ‘full safe’, tin e certificacion cu mester tin, auditoria ta tuma luga, ta falta e decoracion cu lo tapa e saconan ey cu tin un mescla compacta y ta uza internacionalmente den e miho proyectonan rond di mundo.