Recientemente Minister Maduro hunto Minister President y Minister di Labor a comparti e bon noticia cu Conseho di Minister di Reino a bay di acuerdo cu e peticion di Aruba pa brinda yudansa den forma di subsidio di salario. Conseho di Minister di Reino a aproba un fianza di 49.5 miyon florin sin pago di interes pa Pais Aruba pa haci e yudansa aki posibel. Cu e ‘zachte lening’ aki Gobierno por brinda yudansa na comercio pa nan por paga salario di nan trahadonan, mantene cupo di trabou y evita cu 37.000 persona keda sin un entrada debi na e crisis di COVID19.
Subsidio di salario.
E subsidio di salario ta encera cu Gobierno ta brinda un yudansa financiero na e dunado di trabou pa por cubri un maximo di 60% di su gastonan di salario. Cu e subsidio aki e empresario por paga 80% di e salario di su trahadonan. E resto di 20% lo ta e aporte di e trahado cu un reduccion di oranan di trabou. E meta importante di e yudansa di Gobierno ta pa evita cu companianan ta kita e trahadonan for di trabou.
Informacion detaya.
Durante siman di 4 di mei tur doño di trabou cu ta bin na remarke pa e subsidio di salario, lo ricibi un e-mail di SVB cu e informacion detaya con pa aplica pa e yudansa financiero cu Gobierno ta brinda na comercio. Pa mas informacion por bishita e website di SVB www.svbaruba.org bou di MiSVB.
Danki na tur cu ta haci e yudansa aki posibel.
Minister Xiomara Maduro ta gradici e Departamentonan di Gobierno cu a traha hopi duro pa haci e calculacionnan necesario y tambe ta gradici gremio comercial pa nan aporte. E mandatario a subraya cu esaki no ta un periodo facil y lo exigi esfuerso mutuo, pasenshi, comprension y solidarismo di cada un di nos. Pais Aruba por ta sigura cu Gobierno ta trahando incansablemente pa por brinda alivio na Pueblo di Aruba durante e momentonan aki di e crisis di COVID19.
