Awe mainta, Gobierno di Aruba a ofrece un conferencia di prensa pa asina duna di conoce e decision di Conseho di Minister di Reino, na unda Hulanda a aproba un di dos zachte lening pa Aruba.

Pa cu esaki, minister presidente Evelyn Wever-Croes a trece dilanti cu e biaha aki Aruba a haya 49.5 miyon florin. Di e fiansa aki cu a wordo aproba, el a menciona cu no lo paga interes riba dje y tin un plaso di dos aña pa paga bek of refinancia.

Tambe, el a bisa cu esaki tin un meta specifico cu ta a base di e peticion cu Aruba a haci pa por haya un suma y yuda e doñonan di trabou pa mantene e trahadonan na trabou. Asina mes prome minister a splica cu e decision ta basa riba e peticion na unda ademas Aruba a pidi un aporte pa empleado publico of semi publico di fundacionnan subsidia, pa nan tambe haya un aporte pa asina awe por tin e prome suma aproba cu ta pa e luna di mei.

“E bon noticia di esaki ta cu Gobierno por yuda e doñonan y dunado di trabou pa nan por sigui paga e salarionan di e trahado”, prome minister a señala.

Den caso cu e doño di trabou y e trahado yega na un acuerdo mutuo, e suma aki por wordo paga hopi lihe. Di mesun manera el a gradici esunnan cu a demostra solidaridad pa duna un aporte den cortamento di salario den sector publico.

Di su parti, minister di Finanzas, Asunto Economico y Cultura, Xiomara Maduro a expresa cu Aruba ta conta cu un grupo di 55 mil cupo di trabou, di cual 37 mil ta coriendo peliger di no por haya e ora ey un salario. Esaki a pone cu Gobierno di Aruba a traha pa locual ta bira e subsidio di salario, pa haya e fondonan necesario for di Conseho di Minister di Reino.

Di loke a wordo aproba, Maduro a menciona cu e decision a bira cu e dunado di trabou por haya un maximo di subsidio di salario di 60%, cu e subsidio aki e dunado di trabou por paga un 80% di e salario di su trahadonan, na banda di esaki a pidi tambe aporte di e trahado pa asina e tambe por contribui cu un 20% cu lo bira un reduccion di ora di trabou.

Di e manera aki, el a comenta cu e cuponan di trabou por keda reserva, pero ta importante pa enfatisa cu e trahado por keda cu un 80% di su salario y banda di esaki e dunado di trabou ta haya un yudansa di gobierno pa asina por cubri 60% di su gastonan di salario.

Asina mes, Maduro a afirma cu e yudansa aki lo por yuda den e tres luna proximo pa tur hende por tin ‘cabes riba awa’; no ta pa solamente sector publico sino cu tambe sector priva ta wordo afecta. Tambe el a trece dilanti cu tur negoshi mediano y chikito cu ta yega na remarca pa e yudansa aki pa tambe nan por yuda cubri e gasto di salario y asina tur hende por mantene un salario den nan man.

El a informa cu otro siman tur dunado di trabou cu a bin na remarca pa e subsidio aki lo haya un e-mail di SVb cu e informacion necesario pa por haci e aplicacion di subsidio pa salario. Di esaki, Maduro a remarca cu tur informacion cu ta necesario lo wordo manda pa e empresario den e-mail aki y ademas lo por subi website www.svbaruba.org pa haya mas informacion.

Esunnan cu lo haya e-mail tambe lo haya un splicacion pa loke ta trata e pasonan cu mester sigui y kico ta e condicionnan. Di esaki el a informa cu un di e condicionnan general ta cu e compania mester por tin un perdida di entrada di por lo menos 25%, e compania mester ta registra na SVb y tambe e compania mester a sigui paga su trahadonan y cumpli cu su pagonan di impuesto.