Mientras cu Conseho di Ministro di Reino a dicidi di duna gobierno di Aruba mas tempo pa bin cu un plan con ta bay implementa e supervision financiero riba Aruba, a menciona e fecha di 18 di october, dia cu e siguiente reunion di conseho di Ministro ta planea, na un manera cu por satisface gobierno Hulandes.
Den entrevista cu John Samson pa Caribisch Netwerk secretario di estado Raymond Knops a bisa bon cla cu e no ta satisfecho, al contrario e ta rabia ainda y a referi den esaki na e hecho cu den su concepto Staten di Aruba a pone e supervision financiero di CAft y di Reino un banda y cu esey ta inaceptabel, asina un Knops obviamente disgusta a duna di conoce.
El a referi tambe na e carta unda gobierno di Aruba ta bisa cu nan no ta bay manda e carta pa gobernador pa firma pa e haya forsa di ley. E ta haya esey un stap den e bon direccion pero esey no ta suficiente, segun Knops, pasobra e ta haya cu e posibilidad ta keda existi pa nan man’de toch pa Gobernador firma. “Na modo di papia e ta riba nan desk ainda, nan por mand’e ainda. Mi kier ta sigur cu e ta for di mesa.”
Riba e pregunta kico e ta pensa di e expresion usa pa Aruba di a ‘pone awa den biña’, Knops a bisa: “Mi no sa den ki contexto nan a papia di pone awa den biña. Mi no sa di ki awa nan ta papia den cual biña. Ora ta papia di supervision financiero ta asina cu cos mester ta cuadra y e mercadonan financiero mester tin e confiansa cu Aruba ta mantene su mes na e normanan acorda.”
Pa esey segun Knops a yega na un acuerdo cu Aruba, concretisa den e protocol cu mester haya un base legal, mester ta ancra den ley. Esey no a sucede den Staten y cu esey Aruba lo ta core e riesgo di degrading o di un porcentahe mas halto di interes, segun Knops.
Pa loke ta e forma con Aruba lo kier regla e asunto legalmente, segun Knops tin varios posibilidad cu ta na Aruba mes pa dicidi esey.
