Despues di diescinco luna desde cu e prome informacion a drenta cu na Aruba a yega e pandemia di Covid-19, ayera pa prome biaha a bin back na waf di Oranjestad e crucero “Celebrity Millenium” di e compania Celebrity Cruises.

Den un ceremonia di reapertura di e waf cu mira na recuperacion economico di e isla, ayera mainta banda di 7or a yega na Aruba e crucero aki, cu a wordo ricibi cu e ‘water saludo’ biniendo for di Sint Marteen, segun loke CEO di Aruba Ports Authority, Marc Figaroa a anuncia.

“Ora bo ta para riba e pier y wak cu e barco a drenta, e ta yena bo cu emocionnan”, pa motibo cu diescinco luna nan tabatin wardando riba ki dia e dia aki lo yega, na unda Aruba por cuminsa back cu e operacion di crucero, Figaroa a indica.

Ademas, el a sigura cu e ta kere cu pa Aruba en general esaki ta algo grandi y historico. Esaki ta e prome crucero den Caribe cu a cuminsa desde cu pandemia a yega. Tambe ta importante door cu Aruba ta e prome destinacion riba su itinerario, y esey ta mustra con importante e isla aki ta y con a hiba e maneho di e crisis.

Figaroa a informa cu e barco crucero aki a trece un cantidad di menos di 600 turista plus e tripulacion di e barco. Banda di esey, manera a wordo menciona dianan pasa den un edicion di Bon Dia Aruba, tur pasahero di 18 aña bay ariba a wordo vacuna na 100%. Tabatin un cantidad di entre 6 pa 7 mucha cu nan no mag di vacuna, pero nan si tin e procedura di test cu mester cumpli cune.

E biaha aki e barco crucero Celebrity Millenium a sali for di Sint Marteen, el a bishita Barbados, ayera anochi nan a sali caminda Corsou y diasabra e ta yega na Sint Marteen back.

Igualmente, Figaroa a declara cu aki dos siman e mesun barco aki lo ta bishita Aruba back. Pa luna di juli nan tin par di discusionnan confirma pa otro crucero di e mesun compania aki cu probablemente esey si lo por sali for di Merca, segun loke el a bisa.

E apertura di waf ta un comienso un tiki slow manera Figaroa a trece a dilanti, pa motibo cu nan ta depende hopi di ki e situacion di CDC na Florida ta encera, unda cu tin cierto casonan cu ta andando cu estado di Florida a cuminsa contra CDC y esey tambe tin un impacto di con e mundo crucero lo sigui desaroya.

“Te ainda ta depende con e situacion di CDC lo ta y e reglanan cu ta andando aworaki”, el a comenta.

E mayoria di nan ya caba a haya e aprobacion pa cuminsa for di Florida na juli, pa loke na e luna ey Aruba lo por mira mas barco crucero yegando na waf di Oranjestad, di esaki el a remarca cu normalmente e lunanan di juli, augustus te cu september ta e ‘low season’.

Den e ceremonia di reapertura tambe tabata presente prome minister demisionario Evelyn Wever-Croes, minister demisionario di Salud, Turismo y Deporte Dangui Oduber, CEO di ATA Ronella Tjin Asjoe-Croes, entre otro personalidad di e Crisis Team y di e compania di e barco crucero como e capitan.

Oduber a expresa cu e dia di ayera tabata un dia hopi special pa Aruba caminda cu a ricibi e barco crucero desde cu pandemia a cuminsa na unda e actividad di crucero mester a stop pa medidanan di restriccion.

Como gobierno y parti di Crisis Team, Oduber a afirma cu nan mester tuma decisionnan hopi dificil na unda mester a cera economia, cera fronteranan, cuida salud di hendenan, proteha e comunidad y ofrece e solucion cu ta e vacuna, pa motibo cu nan ta convenci cu e vacuna ta e solucion pa yuda vence e pandemia di Covid-19.

“Awe nos ta mirando e frutonan di e programanan di vacunacion cu nos a cuminsa ehecuta algun lunanan pasa”, el a bisa.

Asina mes, el a informa cu ora pandemia a cuminsa nan tabata sa cu e tabata un reto pa convence cruceronan bin back Aruba pa motibo cu cruceronan ta transporta miles di turista y mester tene na cuenta cu pandemia ainda ta presente, na Aruba segun Oduber a menciona nan a haci un enorme esfuerso adicional hunto cu e CEO di APA Marc Figaroa.

El a conta cu nan a haci un biahe pa Merca den pleno pandemia pa asina por splica e compania di crucero kico ta e maneho cu Aruba tin pa cu esaki, kico ta e programa di vacunacion y su meta, ademas nan a informa nan cu pa luna di juni nan lo tabata desea di ta cla den henter comunidad pa ta vacuna.

Pa finalisa Oduber a declara cu e ta sinti contento pa Aruba door cu esaki ta un comienso nobo di recuperacion economico na unda e turismo crucero ta parti fundamental di turismo na unda cu esaki ta crea oportunidad pa taxinan, restaurantnan, tour operators y henter comunidad.