Dia 14 di december 2023 a tuma luga e di shete Asamblea Extraordinario, di Estadonan miembro di e Comision Latino Americano di Aviacion Civil (CLAC) na Lima Peru, na unda a aproba e Declaracion di Lima “Compromisonan pa Desaroyo di Aviacion Civil na Latino America y Caribe, caminda e proximo decada.”
CLAC ta un organismo internacional di caracter consultivo y su conclusionnan, recomendacionnan y resolucionnan ta suheto na aprobacion di cada un di Estadonan miembro -cu awendia ta 22- nan obhetivo ta pa provee na autoridadnan di Aviacion Civil di Latino America, un structura adecua den cual por discuti y plania tur e medidanan rekeri pa cooperacion y coordinacion di actividadnan di aviacion civil.
Mediante un publicacion riba rednan social Gobierno di Aruba a informa cu recientemente Aruba a uni su mes na e “Declaracion de Lima”, pa loke ta metanan strategico di aviacion civil, hunto cu 20 otro pais den region.
Tocante e puntonan cu a ser aborda den e declaracion aki ta papia di: Desaroyo di transporte den region pa aña 2033, accesibilidad di transporte aereo pa un mayoria di personanan den region, promocion di un aviacion sostenibel y comprometi cu medio ambiente, crea un ambiente di resiliencia pa enfrenta posibel crisis, mantencion of aumento di nivelnan di siguridad operacional y di siguridad di aviacion, aplicacion di tecnologianan na servicio di facilitacion di transporte aereo, coordinacion entre autoridadnan di aviacion cu ICAO y otro instancianan internacional pa regulacionnan uniforme y harmonisa, promove participacion di hende muhe den actividadnan di aviacion, capacitacion constante di comunidad di aviacion, unidad di accion pa representacion di e region den instancianan internacional.
Cu presencia di ministernan y autoridadnan di aviacion di estadonan miembro di CLAC, den e documento di Declaracion di Lima a reafirma cu aviacion civil ta un promotor di desaroyo economico y social di paisnan di Latino America y Caribe.
Tambe nan a enfoca den necesidad di mehora infrastructura y uzo di tecnologia den sector aereo, igualmente cu e urgencia di aumenta e conectividad entre Estadonan di Latino America y Caribe, pa facilita e transporte di personanan y bienes.
Manera ta conoci, industria di aviacion pa Aruba ta sumamente importante pa e economia, no solamente pa e parti turistico sino tambe pa e parti di carga.
Pa e motibo ey, ta di importancia pa tin metanan strategico bon defini y pa traha en conhunto, considerando e retonan internacional pa e industria di aviacion. E retonan aki ta inclui, entre otro, pandemia, gueranan, instabilidad politico, gastonan halto pa haci negoshi y disrupcionnan den e cadenanan di suministro. E unico manera pa por logra e metanan menciona ta door di cooperacion, no solamente riba nivel local, pero tambe riba nivel internacional.
Pa loke ta trata e punto di desaroyo di transporte aereo den region pa aña 2033, e documento ta indica cu nan ta compromete pa adopta medidanan eficaz pa logra metanan di aumenta na mas di un 50% e trafico aereo di pasaheronan den region CLAC durante e proximo decada, na beneficio di usuarionan di e medio di transporte aki, di turismo y en general pa e progreso di Estadonan y nan pueblo.
Den futuro, nan ta desea di adopta accionnan concreto pa logra un aviacion civil sostenibel y comprometi cu preservacion di medio ambiente, cu e fin aki nan lo colabora cu desaroyo y promocion di combustibel sostenibel pa aviacion, e transformacion di energia ta necesario pa proximo añanan, apoyando tambe e creacion di combustibelnan nobo sintetico, cu menos marca di carbon.
Nan a compromete pa crea condicionnan pa transporte aereo lo ta mas accesibel economicamente pa mayoria di hende, cu promocion di un ambiente regulado cu lo faborece prijsnan competitivo na nivel mundial y regional.
Nan kier haci impulso di politica, normanan y medidanan di inclusividad universal pa garantisa acceso di personanan cu limitacion na transporte aereo, promoviendo inversionnan cu lo contribui na materialisa e punto aki.
Nan tin e necesidad di promove y exigi respet na principionan cu ta funciona den aviacion civil internacional, specialmente pa loke ta trata trato igualitario y sin discriminacion, den medida cu su no observacion por afecta e capacidadnan tecnico y operacional di Estadonan pa mantene nivelnan mas aceptabel di siguridad operacional.
Pa nan e participacion igualitario ta hopi importante den nivelnan cu ta conforma e actividad di aviacion, generando politica di inclusion, eliminando obstaculonan pa nan por drenta den mercado laboral y haci impulso di un cultura di respet y no discriminacion.
Durante e asamblea aki cu a tuma luga na december ultimo na Lima, Peru, director di Directie Luchtvaart Aruba, Edwin Kelly, tambe a firma un MoU cu paisnan di region pa asina facilita asistencia cu tur tipo di aeronave den caso di un calamidad.
E “Declaracion de Lima” lo bira e guia pa desaroyo di aviacion pa Aruba pa e proximo añanan, na unda Directie Luchtvaart tin diferente programa di cooperacion implementa caba, tanto cu paisnan den Reino como otro paisnan den region y awor lo sigui amplia e programa aki ainda mas.
Cu esaki Ministerio di Transporte, y tambe Directie Luchtvaart Aruba, cu ta responsabel pa e maneho y strategia di aviacion civil na Aruba, lo duna un impulso nobo na e desaroyo di e industria di aviacion na Aruba.
