Diaranson mainta na Brussels a tuma luga e forum na European Comission. Comision Europeo ta e comision cu ta tuma decision riba fondo cu ta wordo aloca pa e paisnan cu ta miembro di OCTA. Prome Minister, Evelyn Wever-Croes, como Presidente di OCTA, tabata presente y a hiba palabra den nomber di e 13 pais cu ta pertenece na e asociacion.

El a expresa cu e reunion tabata un positivo, na unda cu nan a reuni cu e European Commsioner, y a trece dilanti kico ta e deseonan cu cada pais tin. A base di esaki, a logra yega na un acuerdo financiero pa e aña binidero di un suma di 15 miyon euro, cu lo wordo reparti igual den e 13 paisnan, sumando un suma di 1.15 miyon euro pa cada pais. Den e simannan binidero, Gobierno di Aruba lo dicidi cua ta e proyectonan cu nan ta bay scoge pa aloca e fondo aki.

Minister Geoffrey Wever a firma acuerdo financiero di 14.2 miyon euro

Prome Minister a expresa cu e dia di awe ta uno grandi pa pais Aruba, mirando cu Minister di Asunto Economico, Comunicacion y Desaroyo sostenible, Geoffrey Wever, como e oficial autorisa pa Aruba pa firma, a firma e acuerdo riba e-Government. E proyecto di eGovernment ta un proyecto cu Gabinete Wever-Croes hunto cu e team di Futura y e team di innovacion tin hopi tempo caba trahando riba dje, di cual a entrega un plan na Union Europeo.

Riba e dia di ayera, Aruba a logra e acuerdo financiero di 14.2 miyon euro pa por finalisa e proyecto di digitalisacion di e procesonan di Gobierno. E suma aki lo wordo duna den tranche. Na momento cu Aruba entrega un plan pa un proyecto, y e wordo aproba, Aruba lo ricibi e placa, y unabes finalisa, lo por aplica pa e siguiente proyecto. Esaki ta pone cu e proceso pa digitalisa e departamentonan di Gobierno lo dura algun aña. Prome Minister a indica cu Gobierno lo identifica cua ta e departamentonan, y cua procesonan tin prioridad. Unabes cu e plan ta cla, lo comunica na comunidad di Aruba, con e placa aki lo wordo usa pa cu digitalisacion di e departamentonan di gobierno.

Implementacion di e programa lo inicia den di dos mitar di 2024 y lo tin un duracion di 4 aña.

“Riba e dia special aki, mi ta sinti mi hopi orguyoso di ta un Arubiano, y mas ainda di ta Prome Minister di pais Aruba. Mi ta gradici tur esnan cu a yuda nos pa yega asina leu, na unda cu awe Minister Geoffrey Wever por a firma e acuerdo financiero di14.2 miyon euro pa Aruba. Esaki a cay riba un bon momento, ya cu e ultimo proyecto cu Union Europeo a financia pa Aruba ta e facultad nobo di SISSTEM, di cual edificio nobo ta kedando cla na Mei 2024. Esaki ta e Maria Convent na playa cu tabata bandona pa hopi tempo. Awe e edificio aki ta birando un hoya cu lo ta parti di Universidad di Aruba pa e facultad di SISSTEM.

“Como Presidente di OCTA, mi compromiso ta pa Aruba sigui bin na remarca pa fondonan asina, y pa haci e proceso di aplicacion pa fondo mas facil pa e 13 paisnan cu ta miembro di OCTA. Pabien Aruba pa un dia asina exitoso na Brussels”, Prome Minister a expresa.

“Mi ta hopi contento y orguyoso di por a representa Aruba awe, na un momento asina importante Pabien na Aruba cu un paso sumamente importante y pabien tambe na colega Minister President Evelyn Wever-Croes y full su team cu a traha riba e proyecto di eGovernment cu awor por wordo implementa.”

E delegacion di Aruba ta consisti di Minister-Presidente Sra. Evelyn Wever-Croes, Minister di Asuntonan Economico, Communicacion y Desaroyo Sostenibel Sr. Geoffrey Wever, Gevolmachtigd Minister Sr. Ady Thijsen, Directora di Departamento di Asuntonan Economico, Sra. Maria Dijkhoff-Pita y consehero huridico na Aruba Huis, Sra. Shandra John.