Aruba a celebra dia di Metanan di Desaroyo Sostenible enfoca riba bienestar y prosperidad pa tur

Dia 25 di september di 2015, e lidernan mundial na un Asamblea General di Nacionnan Uni a adopta un conhunto di obhetivonan global pa elimina pobresa, protege e planeta y sigura e prosperidad pa tur como parti di un agenda di desaroyo sostenibel, cada obhetivo tin un meta specifico cu nan lo mester logra den e proximo 15 aña.

Diabierna ultimo a tuma luga e celebracion aki cu e presencia di diferente personalidad di comunidad di Aruba, politiconan y ministernan tambe cu a presenta pa asina duna apoyo na e iniciativa aki.

Xiomara Maduro minister di Cultura y Finanzas a splica cu esaki ta e seis aña den cual nan ta conmemora e 17 meta mundial pa un desaroyo sostenibel pa pais Aruba y pa henter mundo.

Di mesun manera, diabierna atardi tambe a wordo mustra un serie di videonan na unda ta splica con Aruba ta prepara y ta implementa lo cual ta bira e metanan aki, “mes cos cu tur pais, nos pais tambe ta anhela pa crece, pero e crecemento aki mester bay di manera sostenibel”.

Cu esaki e 17 metanan di SDG’s ta enfoca riba proteccion di nos planeta y e bienestar di su habitantenan, ora cu SDG’s a wordo aproba pa 193 pais a marca un epoca nobo na unda a realisa cu desaroyo di un pais y e bienestar di su habitantenan ta uno na unda desaroyo economico, social y alabes proteccion di medio ambiente ta mara na otro y mester ta uno cu ta den balans pa asina e pais por progresa.

“Tur dia cada un di nos por tuma un accion o por haci cierto stapnan pa contribui y yega na e metanan cu SDG’s aki ta para pe, Gobierno di Aruba ta uni su mes na e plannan aki y ta wak e SDG’s como un guia pa nos por yega na un nivel mas eleva di prosperidad na nos pais”, Maduro a declara.

El a duna como ehemplo con gobierno ta bin implementa SDG’s na Aruba na unda cu el a menciona cu a lanta un comision nacional di SDG Aruba cu ta consisti di departamentonan di gobierno y ta encarga pa coordina y duna direccion strategico na implementacion di SDG’s.

Ademas, tambe el a bisa cu nan ta traha hunto cu Nacionnan Uni un roadmap cu ta delinea un ruta cu Aruba tin cu cana pa asina por implementa e SDG’s aki, nan a integra tambe e metanan aki di desaroyo sostenibel den presupuesto di pais Aruba y tambe varios ministerio y departamento a traha plannan sectorial cu ta delinea SDG’s, por ehemplo e Plan Nacional di Enseñansa, Plan di Naturalesa y Medio Ambiente, Social Crisis Plan como otronan, asina mes, el a expresa cu pa e implementacion di SDG’s nan ta conta ademas cu un plan nacional strategico y pa finalisa un master plan cu segun el a sigura, “ta completamente alinia na lo cual ta e metanan aki di desaroyo sostenibel”, Maduro a bisa.

Di su parti, Jocelyne Croes presidente di comision nacional di Aruba pa Desaroyo Sostenibel a conta cu na 2017 nan a wordo instrui oficialmente pa por duna un direccion strategico y coordina e implementacion di SDG’s na Aruba, “esaki ta un momento unico na unda nos kier para keto ta con nos por crea un mundo na unda tin miho bienestar y prosperidad”.

E agenda aki ta uno cu a demostra cu no por tin un desaroyo economico si bo no tin esaki balansa hunto cu e aspectonan social y teniendo na cuenta cu naturalesa, “esakinan ta un transformacion cu nos ta wak nos dilanti na unda bo ta wak cu si bo ta traha riba un meta, e tin un impacto riba otro, p’esey nos mester traha di un forma integral pa por contribui na un miho mundo y sigur na un miho Aruba”, Croes a sigura.

Lo cual ta para nos dilanti ta cu tur sector por ta envolvi, cada un persona, comercio, organisacion no gubernamental, por ta envolvi pa haci e cambionan aki cu ta keda na cada individuo pa por ta consciente di e impacto cu cada persona ta haci y nan contribucion riba e mundo aki.

Setty Yarzagaray cu ta parlamentario y ta forma parti di e comision nacional a duna un palabra di pabien na esunnan cu di un forma of otro ta contribui na SDG’s aki, “mi mes a haya mi hopi di cerca cu esakinan, no solamente esaki ta bin for di mundo di data pero tambe ta bin for di mundo di purba logra metanan den un sentido cu di duna un miho direccion na mundo”.

Den esaki e metanan a wordo desaroya pa evita cu cierto cosnan cu ta premira cu ta bay pasa e por pasa y hiba Aruba den un bon direccion.

Su rol den parlamento ta cu el a institui e comision di SDG’s tambe pa asina e por ta no solamente pa cumpli cu e metanan cu ta e number 16 na unda cu institucionnan tambe ta inclusivo den e programanan aki pero tambe mester por marca riba cuatro punto specifico unda cu SDG’s ta cambia diferente leynan, na unda cu hopi leynan mester wordo modernisa y esaki ta un rol unda cu parlamento tin cu hunga pa esunnan cu ta pasa e parti di leynan.

No ta solamente 17 meta sino tambe tin diferente indicadonan unda cu a base di nan ta midi e desaroyo y ta progresa pa asina wak si como pais Aruba ta logrando conhuntamente cu e resto di mundo.