Artista Stephen Diaz: ‘E intencion ta pa trece union den comunidad’

Bon Dia Aruba a tene un entrevista cu artista local Stephen Diaz, kende hunto cu Jeremy Garcia a lansa cantica nobo ‘yiu di tera’ cu mensahe pa tur hende den comunidad.

Stephen a cuminsa for di 6 aña di edad den e mundo di musica na un iglesia, despues FDEC pa 6 aña y na scol di musica Rufo Wever cu Carlos Bislip. El a cuminsa manera instrumentalista cu drums, despues el a pasa pa percusion, piano, bass. Pa varios aña el a dedica den varios instrumento, sinembargo drums ta su instrument principal.

Unda cu e ta splica cu eynan tabata mas compleho cu preparacion pa sigui studia pa bay Merca. Durante esey el a cuminsa skirbi musica y compone di su mes ‘mi tabata skirbi y toca’.

Stephen di 21 aña di edad hunto cu Jeremey Garcia a bin cu idea pa skirbi un cantica cu intencion pa trece union den comunidad. Sinembargo e intencion tabata pa Stephen skirbi e letra y Jeremy canta ‘mi no a pensa pa hinca mi mes den cantica’. Na final ambos a canta e cantica.

“Nos tabata amigo for di hopi tempo y toca den un grupo cu yama Caribbean Combo. Nos tabata toca den diferente evento manera Caribbean Sea Jazz Festival. Nos amistad a cuminsa crece. Jeremy a sigui su estudio na Hulanda”, Stephen ta bisa.

Pa vakantie grandi Jeremy a bin Aruba bek pa motibo cu nan lo toca den concierto. Den un ensayo nan a dicidi pa ‘bay jam algo hunto’. Nan a bay banda di lama y eynan idea a nace pa ‘yiu di tera’.

Sinembargo Stephen ta bisa cu e idea tabata pa skirbi e letra pa Jeremy. Ora idea tambe a sali nan a no tabata sa di e marca ‘yiu di tera’ e fundado di e marca di paña a dicidi di promove e paña via e cantica.

Stephen a bay su cas y cuminsa skirbi e cantica. Manera el e keda cla cu e letra di e cantica el a yama Jeremy. E prome version di e cantica tabata acustico pero despues di a tene combersacion cu Glen Geerman, kende lo a bira director di e cantica y Jeremy Garcia a dicidi di haci un cambio.

“Nos a sinta papia di e proyecto pero despues di a trece dilanti, a ripara cu no tabata cuadra cu e cantica. Mi a bay cas y dicidi haci cambio y haci henter un otro version, agregando melodia nobo y hinca yen instrument. Hunto cu evolucion e cantica ta locual el a bira awo. Mi a yama Ozin, kende a produci e prome version y mi a bis’e pa e yega. Nos a graba e mesun anochi henter e cantica nobo.”

A puntra Stephen cual ta e concepto di yiu di tera. E ta bisa cu concepto ta cu no ta importa bo pasado, di unda bo ta bin, bo rasa, criansa of religion. Tur cos tin di haber cu tur ta pertenece na un pais caminda tin libertad pa pensa, stima, haci hopi cos ‘anto esey ta algo pa ta agradecido na dje’.

E ta splica cu na Aruba tin discriminacion pero mester sa cu pasobra un persona a ‘nace na aki no ta haci cu abo so ta pertenece’. Den e video por mira diferencia di nacionalidad y por mira con tur hende ta mescla cu otro.

“Pa mi e tabata manera no ta importa di unda bo ta bin pero esaki ta nos. Tin diferente biaha den e cantica den e verso cu ami ta canta cu ta papia di con nos ta neglisha tur e bunitesa cu tin rond di nos. E libertad cu nos tin na Aruba. Nos no ta tume na serio con bon nos tin’e akinan. Den e momento ey mi a sinti inspira pa skirbi esey”, el a expresa.

Durante filmacion, Stephen ta bisa cu tabatin stress pa algun cos no a bay manera a planea pero ta contento pa Glen Geerman y Yeremyh Maduro, e cinematografo pa yuda den e proyecto. Cu tur cos a keda cla y entrega un video musical pa henter pueblo mira.

A puntra Stephen na ken nan kier yega cu e video aki. E ta bisa cu tabatin un momento caminda un señora tabata pensa pa motibo cu no a nace na Aruba no ta haci’e un persona di local. E momento a realisa cu no mester nace na Aruba pa sinti asina.

E gol di e cantica tabata pa trece union. “Tin hopi desunion basa riba creencia, ami mes ta un persona cu ta kere den Dios y mi ta expresa esey hopi. Mi ta spera den futuro cantica lo expresa esey y hopi mas pero meta ta union. Mi ta uza mi herment cu Dios a dunami, menciona cu e ta regalo cu Dios ta duna nos cu mester siña balora y comparti.”

Stephen ta splica cu nan kier yega leu pa crea un plataforma hunto cu Jeremy lansa nan mes como artista y musico. E ta expresa cu e tin hopi aña den musica y den e mundo cu e tin material pa traha cune skirbi.

“Mi meta persona ta pa uza talento cu Dios a dunami pa expresa mi fe y creencia cu ta e pasion grandi cu mi tin. Mi kier trece speransa, cuido, expresa amor via musica, expresa mi mes tambe. Por spera cu mi lo saca mas musica y mas proyecto cu ta biniendo den tur area di arte”, e ta bisa.

Tambe pa Jeremy, e ta bisa cu ta trahando duro na Hulanda cu su proyecto y ta kere definitivamente nan lo traha hunto den futuro. Stephen mes ta skirbi cantica pa su amigo. E ta enfatisa cu ta gradici Dios pa tur oportunidad cu el a duna den su bida pa sigui crece na Aruba y den exterior.