Artista local di tatuahe Rachell Peterson recien a ricibi un reconocemento na Alexandria, Louisiana su exposicion di tatuahe Red River. E artista a ricibi prome luga den tatuahe di colo y di tres luga den tatuahe riba man. Bon Dia a combersa cu e artista tocante su carera y experiencia como un persona cu un small business na caya grandi.

Sra. Peterson ta conta nos cu na prome instante e no por a kere cu el a haya un reconocemento na nivel internacional pa su trabou como artista di tatuahe. E manera cu sra. Peterson a wordo sorprendi por tin di ber cu ta un artista femenino den un industria domina na gran parti pa hende masculino. Sinembargo e artista a expresa cu e ta sumamente orguyoso di e reconocemento aki. “Pa hopi tempo e tabata un meta di mi pa ricibi algo asina, specialmente pasobra na Aruba ta dificil pa haya reconocemento den ramonan artistico. Y mucho menos como artista di tatuahe femenino.”

Prome cu nos entrevista, sra. Peterson a bay door di su papelnan warda unda el a haya par di su prome dibuhonan. ‘Mi ta alivia cu mi a mehora!’, ta loke e artista a expresa ora el a mira nan.

Pa haya prome luga den un exposicion internacional di artistanan di tatuahe tin su peso pa sra. Peterson specialmente pasobra e no a cuminsa haci tatuahe cu e guia di un mentor. T’asina cu normalmente den mundo di tatuahe un persona mester cuminsa cu un mentor cu lo siña e studiante con pa uza tecnicanan di tatuahe, dibuho, etc. “Mi no tabatin ningun guia den cuminsamento pa bisa mi cu mi ta haci algun fout of cu mi mester mehora cierto aspectonan. Mi mes a cana mi caminda. P’esey e tabata un meta asina grandi. Pero awo cu mi a yega eynan e trabou di berdad ta cuminsa.”

Sra. Peterson hunto cu Gregory Tromp tin un negoshi na caya grandi yama Black Sheep Body Arts. Pa 8 aña caba e negoshi ta existi na caya grandi. Pero awo un di e plannan cu nan tin ta pa move bay otro area mas cercano na turista. ‘Mi agenda ta yen yen caba’, sra. Peterson ta conta nos. Pues e ta sinti cu nan por expande na un luga cu por acomoda nan clientela miho. Tanto como pa tatuahe como pa piercings sra. Peterson ta sinti cu nan por beneficia di expande nan negoshi pa por acomoda mas turista y sigur e clientela cu nan tin pa basta tempo di local.

‘Na Aruba no tin leynan cu ta trata higiena di tatuahe y piercing’

Aunke den cuminsamento nan negoshi tabata masha humilde y tabata un simpel tienda di paña, despues di un par di aña e pareha a dicidi di sigui nan soñonan y bira artista di tatuahe y piercer, respectivamente. Black Sheep a sa di inverti den hoyanan di calidad traha specificamente pa industria di piercing. “Nos ta kere e ta hopi importante pa reconoce e diferencia entre un producto di calidad y algo di plastic cu no ta wordo produci cu hende den mente.”

Aunke segun sra. Peterson tin hende cu ta prefera di bay cu e opcion mas barata, nan como negoshi ta para tras di loke nan ta kere den dje den aspecto di calidad y higiena. E parti di higiena en particular sra. Peterson ta pone hopi enfasis riba dje, mirando cu no tin ningun ley of regulacion cu ta trata tatuahe y piercing. “Basicamente bo por haci kico bo kier, aunke esaki no ta avisabel.”

Pues na Aruba no tin niun tipo di certificacion cu ta establece cu e artista tras di e hangua sa kico e ta haciendo y tin tur su testnan di salud na ordo. Segun sra. Peterson nan a cuminsa cu e certificacion di tatuahe y piercing ora cu sr. Tromp a cuminsa bay conferencianan di Association of Professional Piercers na Merca. E assosiacion tin normanan stricto pa testnan di sanger, higiena, AED y CPR.

E normanan aki ta varia pa cada pais y na Merca cada estado. “Na California por ehempel bo tin cu tin un vacuna pa Hepatitis C. E ultimo biaha cu mi a bay na Louisiana mi tabatin mester di certificacion di American Red Cross Association pa eerste hulp y malesanan transmiti via sanger. Tambe bo mester tin e certificacion specifico di eerste hulp y malesanan transmiti via sanger pa por practica body arts.”

Caya grandi a bira dificil pa negoshi chikito

Manera menciona anteriormente sra. Peterson tin pensa di move su negoshi na un area mas cercano na turista pa por haya mas cliente di afo. Sinembargo esaki no ta e unico rason, mirando cu e situacion na caya grandi ultimo añanan a bay atras pa loke ta trata comercio.

“Desde 2009 nos ta na caya grandi y nos a pasa den hopi tempo dificil. Pero nos a crece hopi tambe. Cu e reconstruccion di caya grandi por ehempel nos a perde hopi pero nos a siña di adapta. P’esey nos a stop di bende paña pa algun tempo y a dicidi di bay mas chikito pa ta confortabel pa paga huur. Pero pa via di esaki nos por a enfoca mas riba nos specialisacionnan tambe.”

Aunke Black Sheep a sa di sobrevivi pa via di adapta nan mes sra. Peterson no ta desmenti cu hopi negoshi chikito a bay for di caya grandi. E situacion cu sra. Peterson ta describi ta uno cu ‘no ta stabiel’. Pues p’esey nan tin pensa di busca mas cliente turistico den futuro y move for di area di caya grandi.

Plannan pa futuro

Riba kico mas e artista tin pensa di haci den su futuro e no ta sigur. Despues di a yega na un meta basta grandi caba ainda tin basta tereno pa explora. Sinembargo sra. Peterson a expresa cu tatuahe ta mas un estilo di bida p’e. “Mi kier sigui bay rond mundo y atende mas conferencia y duna les. Mientras mi ta haciendo loke ta haci mi feliz mi no tin di preocupa pa mucho. Ya caba mi ta sinti manera mi ta living the life haciendo loke mi gusta cu mi famia y mi negoshi.”

E estilo di bida cu sra. Peterson a scoge p’e ta permiti’e di por pasa tempo cu su famia, cual normalmente lo ta un problema pasobra tatuahe ‘di berdad ta ocupa henter bo bida’. Te hasta ora sra. Peterson ta na cas e mester pensa riba e diseño pa cierto tatuahe.

“Mescos cu e proceso di tatuahe ta constante y nunca ta stop, arte tambe no tin fin. Mi ta kere si abo como artista ta sinti manera bo a yega e punto di bo carera bo ta muri artisticamente. Bo tin cu sigui evoluciona. Te hasta si bo a domina un tecnica tin miles otro tecnicanan pa siña.”