Bon Dia Aruba a tene entrevista cu Nahliel Marquez, un artista musical local cu a cuminsa descubri su talento y pasion pa musica cu edad di 13 – 14 aña, y despues a ripara cu su meta ta pa yega na un nivel internacional.

Marquez a comparti cu tempo cu e tabata bay un iglesia, el a mira cu tabata buscando hende pa yuda den e banda di misa, y el a dicidi di acerca y forma parti di e coro. “Mi a cuminsa canta den coro di iglesia y cu cantica rap, urban. Eynan mi a cuminsa cu e desaroyo.” El a participa den festival cristian na Aruba hunto cu otro cantante na Cas di Cultura.

El a cuminsa realisa su potencial y talento, y el a ripara cu “e plan di Dios pa mi bida ta e regalo cu el a duna mi.” Henter su adolencia el a keda den area di iglesia, te ora cu na su 20 aña el a dicidi di stop y cuminsa dedica atencion na arte comercial.

E ta bisa cu su enfoke den area secular, ta pa bira famoso. Su carera comercial a cuminsa crece for di 2016. Na 2018 el a drenta ‘gang di arte’. E tema di e aña ey tabata pa enfoca riba idioma Papiamento. Esey a inspira Marquez pa elabora su tema musical ‘Papiamento’.

Segun e ta splica, esey ta e cantica cu a resalta mas aki. “Mi enfoke semper tabata riba Spaño. Pero pa e competencia di Cas di Cultura cu nan edicion pa resalta Papiamento como idioma sea den musica, pintura, baile, pa e motibo ey mi a skirbie y el a sali na 2019.”

Marquez a bisa cu despues di esey, el a bay haci un promo tour na Colombia; na e momento di ta den e proceso ey el a dicidi di cambia di direccion; “mi no kier a bay den esey,” el a bisa. E lo bin cu contenido nobo pa hende por scucha den e rumbo nobo aki.

Un audiencia nobo lo sigui den e direccion ey. E ta bisa cu locual e perde den bida, Dios lo dun’e mas y lo supli e audiencia cu palabra di ‘aliento y berdad’. Na juli 2019, el a bisa cu e tabata mester un cambio, ora cu el a bolbe di Medellin y el a bay papia cu su famia.

E ta splica cu el a cuminsa bira consciente di tur locual tabata pasando alrededor di su bida. Su enfoke tabata tin e ciego, pa por pensa kico en berdad e tabata kier. Unda cu el a ripara tambe cu su famia tabata mester di dje.

Marquez tabata cla pa laga tur cos bay y cuminsa su carera den exterior pero despues cu el a tuma un decision pa cambia su bida, el a dicidi di keda.

“Mi a sinta analisa mi bida y pensa kico mi ta haciendo. Sociedad tin problema caba y ami ta dunando mas gasolin, veneno na e problema. Mi tabata parti di e problema y no di e solucion, anto eynan e proceso a cuminsa, mi a sinti’e den mi curason.”

Un proceso cu segun e ta splica no tabata di un dia pa otro. E dia a yega caminda el a tuma decision pa bolbe den iglesia. Sinta cu pastor y papia cune pa asina trece solucion pa e problema cu e tabata aden na e momento ey.

El a cuminsa skirbi cantica positivo, cu enfoke riba Dios, lesa Bijbel, “usa locual mi tin pa usa den Dios.” Marquez kier usa su talento di un bon manera pa duna bon ehempel y bon influencia na hubentud: “Mi a mira y experimenta tanto cos cu nos hobennan y comunidad; nos mester algo diferente.”

E vision cu Marquez tin y cu segun e Dios a dun’e, ta internacional. E sa cu Aruba ta un isla chikito pero Aruba ta uno mas den Caribe y den su vision e enfoca riba un mensahe positivo den su musica.

Pa locual por spera di Marquez, e ta biniendo cu un proyecto nobo pa yega na un audiencia internacional, cu su misa na Spaño:”esey ta mi meta pa for di Aruba sali cu cosnan internacional.”

Marquez lo enfoca den area profesional riba e parti positivo y cristian. E cambio di direccion y contenido mas positivo pa comunidad. “E lo ta e mesun sonido, locual ta contenido ta bay cambia.”

Un mensahe cu e ta manda pa tur hoben ta pa corda cu disciplina ta gana talento: “Ora bo tin tur dos bo ta bira un icono.” Esey ta e conseho cu e ta duna tur hoben, “sin importa den ki arte nan ta aden, pero disciplina mester ta presente.”