Durante un entrevista cu artista multidisciplinario Jess Wolff, Bon Dia a combersa cu e artista riba e importancia di experimenta tanto den creatividad como den bida y tambe riba tema di raiznan di carnaval.
Artista multidisciplinario Jess Wolff actualmente ta guiando gruponan regular den sesionnan pa traha dibuho titula Doodles n Drawings. Cada diamars na Pop Up Cafe na fin di caya pa 7or di anochi un grupo di persona ta reuni pa asina come pizza y traha dibuho, sin importa nan nivel di tecnica y conocemento den e sesionnan. E sesionnan ta wordo guia di tal manera cu ta duna espacio na cada persona pa desaroya nan propio creatividad y laga esaki bay di manera liber.
Loke dibuho ta representa
Bon Dia a combersa cu e artista, kende ta splica cu traha dibuho ta un di e practicanan cu ta sirbi manera un tipo di lijm cu ta link tur e diferente disciplinanan cu e artista ta uza den su practica hunto. Specificamente den contexto di e sesionnan di Doodles n Drawings, sra. Wolff ta splica cu e idea ta pa no limita ni tin control riba loke e personanan traha. Pues no ta trata di domina tecnica. Esaki mirando cu hopi hende cu no tin experiencia den expresionnan artistico hopi biaha ta worry mucho hopi pa algo ta bunita of perfecto, segun sra. Wolff. Esaki no ta algo cu ta yuda e proceso creativo sra. Wolff ta splica pasobra dibuho ta un practica cu por wordo uza pa ‘haya bo mes y deal cu emocionnan’.
Sinembargo, traha dibuho hopi biaha lo intimida menos cu pintamento y otro medionan, pues ta un bon manera pa drenta den procesonan di creatividad cu pa sra. Wolff tin nan beneficio pa estado mental tambe. “E flow cu bo ta drenta den dje ta un tipo di meditacion. Ami mes ora mi ta keda pega cu otro trabounan ta bin bek na dibuho pa haya mi caminda bek den loke mi tabata haciendo.”
E artista y su trabou interdisciplinario
Cu un portfolio y trayectorio extenso, sra. Wolff no solamente ta envolve su mes den diferente exposicionnan y proyectonan artistico cu meta pa fomenta creatividad bou comunidad, si no cu el a yega di organisa diferente proyectonan y exposicionnan bou nomber di colectivo di arte Much’i Mondi. Entre otro e artista a yega di duna varios Kid’s Camps na centro creativo BEAM hunto cu otro artistanan local manera Beach y Velvet Zoe Ramos, pero tambe el a yega di organisa un serie di evento yama Translucent Moon cu a haya 3 edicion den diferente añanan. E eventonan aki a duna un luz diferente na luganan manera hofinan den Parke Arikok por medio di ilumina esaki cu arte y expresion di tur disciplina y cu colaboracion di tanto artistanan local como internacional.
Pa loke ta trata e artista su trabou creativo, esaki tin un caracter multidisciplinario unda ta haci uzo di diferente medionan manera textiel, dibuho, klei, pintamento y diseño di paña. Den tur esaki e artista ta splica cu e ta sinti su mes como autodidact den henter e rango di trabou of medio cu e ta envolve su mes den dje. “Mi no a siña ningun tecnica specifico na scol, loke mi a siña eynan ta con pa tin mi mesun handschrift, di manera di bisa.”
Sra. Wolff ta haya cu e proceso di acepta cu su manera di siña ta autodidact, tabata uno confuso. “Mi ta mira cu hopi hende sea den expresion of otro cos ta experimenta pa un tempo y despues ta determina kico nan kier sigui bay profundisa nan mes mas den dje. Pero mi ta sinti cu mi no tin limite den mi universo di exploracion. No cu ta malo pa scoge e manera ey, pero personalmente mi no ta sinti cu mi tin cu wanta mi mes mucho duro na un caminda specifico pasobra mundo ta hopi habri y tin libertad pa explora.”
Den mesun rosea e artista multidisciplinario a splica cu despues di a wordo invita pa crea un trabou den Museo Historico su exposicion ofishi cu tema di vlechtmento den historia di Aruba, el a haya sa cu su antepasadonan di Savaneta tabata e personanan cu a cuminsa cu e ofishi riba nos isla. Esaki tabata un momento di claridad pa sra. Wolff, kende pa hopi tempo tabata tin un talento natural pa vlechtmento. Pa sra. Wolff, expresion ta e libertad cu cada persona tin pa por deal cu e retonan cu nan ta carga den nan bida personal.
‘Mi kier mas hende ta habri pa experimenta’
“Mi ta identifica mi mes cu experimenta y mi deseo ta cu mas hende ta habri pa experimenta den cualkier forma pa haya nos propio estilo y nos propio bos.”
Si esaki por wordo aplica fuera di creatividad y tambe den un sentido mas general, e artista ta haya cu specialmente na Aruba unda nos ta wordo afecta hopi por medio di loke ta rond di nos, e ta keda primordial pa experimenta y tin ‘nos propio identidad, opinion y perspectiva’.
