Artista Erika Moran: “Mi mensahe ta pa hiba e grandeza cu nos tur tin aden y e grandeza ey ta implica arte”

Erika Moran, un artista di arte plastico cu a pasa den hopi etapa den su bida y esey hib’e te unda e ta awe, den un entrevista special cu Bon Dia Aruba a haci cu el a conta cu e tabata den un biahe interno den cual el a cay den depresion, pero bida a siñ’e kico e tabatin den su interior y kico e por ofrece na otronan.

Durante entrevista, Moran a bay back den tempo y a bisa cu el a bin Aruba for di Barranquilla, Colombia, 14 aña pasa siguiendo un amor, esey a hib’e explora e cultura di Aruba. E tabata lesa e himno nacional, siña e idioma y conoce hende local, loke den su pensamento tabata pa un motibo.

“M’a conecta cu e trankilidad di e isla, cu harmonia, e lama cu pa mi ta mi terapia y a traves di un buskeda inmenso, mi a descubri cu mi tabatin hopi tempo sin pinta y mi a cay den un tristesa grandi,” el a sigura.

Depresion ta un palabra cu el a sintie y bib’e di cerca. E ta sinti cu tin e deber di papia di esey pa motibo cu “mi sa cu eyfo tin hopi hende cu na e momentonan aki, na tur parti di mundo, tin hende cu ta cay den un tristesa grandi. Y mi a descubri cu esey ta un manera cu mi alma tabata touch mi y bisa mi pa mi saca afo tur loke a mi tabata realmente.”

Den e buskeda ey, tur hende ta busca kico por duna na e otro personanan y kico e cosnan cu por haya ta duna. “Pero esey realmente no ta loke ta yena bo,” esey ta paden di cada un y ta mustra loke e persona ta. Moran a descubri cu e tabata buscando afo algo cu e tabatin caba den dje. “Loke mi a haya ta cu mi ta artista y a traves di esey ma cuminsa explora e naturalesa di Aruba. M’a conecta cu su colornan y a traves di mi obra mi tabata kier transmiti e expresion ey na otro personanan,” el a declara.

A traves di colornan y e psicologia di cada un di nan, el a cuminsa usa e cuashinan mustrando e fauna, flora y lama pa transmiti un estado emocional pa personanan por conecta a traves di su obra cu nan estado emocional.

“Psicologia di color por transmiti bo calma, stress, un estado di buskeda interno tambe, cu ta representa e camindanan di subconsciente y e camindanan ey ta representa a traves di color biña, blauw, cora, te yega e color geel cu ta iluminacion. Esey ta e mensahe, pa hiba e grandeza cu cada ken tin paden y e grandeza ey ta implica arte,” el a bisa.

Den su opinion, tur hende tin arte y tur hende ta un artista. E unico manera cu cada ken por canalisa esey ta a traves di arte y cu estado di creatividad ey cu ta inclui diferente emocion como alegria, tristesa, euforia, nan ta relaciona cu e artista y cu tur persona tin aden. “Esey tabata mi biahe pa acepta mi mes despues di hopi intento di ta otro hende, otro version di mi. Awor mi ta artista y mi ta siña e otronan cu nos tur tin e capacidad ey.”

E esencia di bin na e mundo aki ta pa siña, manera Moran ta enfatisa, siña otro hende con por haci esey. “Siña cu aunke e caminda ta duro, nos tin cu conecta cu otro pa ta un faro pa e otronan. Imagina bo si tur ta ripara esey? Nos por logra otro mundo. Nos tin cu yuda otro y asina crea un cadena maraviyoso cu ta bay tuma tempo, pero ta vale la pena.”

Moran aparte di pinta y ta den constante buskeda pa expresa su mes, tambe ta siña cu lesnan di arte, unda e tin un otro proyecto cu ta na caminda y esey ta nifica su mesun espacio, cu ademas di siña diferente tecnica artistico tambe e kier promove artistanan nobo y bende nan productonan.

“E idea principal ta pa siña e arte y bende e obranan ey, siña kico ta e cultura di Aruba por medio di souvenir haci na man cu lo identifica loke ta historia, simbolonan, Aruba en general, pa tur hende cu ta bin na e isla aki por yega na e espacio aki cu tin artistanan y artesania cu hopi creatividad, talento y nan por bay cu esey.” Moran a señala.

E ta sigura cu esaki ta for parti di Orange Economy, un economia sostenibel unda hende por expresa nan creatividad y monetisa esey. “Tin hopi mama cu ta cabes di famia, pensionado, muchanan cu ta descubri nan talento artistico y esey por nifica cu den futuro, nan por ta embahador di cultura y di Aruba en general.”

Pa Moran e proyecto aki ta hopi importante di tur loke el a haci te awor.

Ademas, el a informa cu pa Dia di Mama su persona hunto cu Soraida Wever, ken tabata e persona encarga cu Cosecha tempo pasa, tin un workshop na Kulture Cafe na San Nicolas diabierna 12 di mei. El a sigura cu tur participante cu ta hende muhe ta bay pinta cu e tecnica di colorful. “Nos ta bay expresa nos ser femenino y su diferente faceta, estadonan, emocionnan, muhe ta e creacion y expresion di su naturalesa femenino.”

El a finalisa bisando cu nan tambe ta promociona algun evento pa turista por siña arte, conta nan di historia di Aruba, papia cu nan di e luganan turistico y pinta nan tambe, cu esey e hende ta conecta cu cultura, arte y ta hiba un experiencia diferente di entretenimento.