(EFE) – Pintor y escultor Colombiano Fernando Botero, un di e artistanan Colombiano mas popular, conoci pa su esculturanan di curpa diki, a fayece ayera diabierna cu 91 aña, segun su famia a informa.
E artista cu a nace na Medellin dia 19 di april 1932, tabata sigui pinta na su estudio hasta cu el a bira malo cu neumonia pa loke mester a drenta den un hospital, aunke diahuebs ultimo a sali y a bay su cas.
Su yiu muhe Lina Botero, a splica cu su tata a fayece na Monaco ayera mainta: “Tabatin cinco dia basta delicado di salud pa loke a desaroya un neumonia.” “El a muri cu 91 aña, e tabatin un bida extraordinario y el a bay sosega na e momento indica,” el a recorda su tata como un persona “cu a dedica su bida na su pais, cu tabata e tema di su obra artistico.”
E pintor a studia na Colombia y na Real Academia di Arte di San Fernando na Madrid, eynan el a inicia exponiendo den e decada di 1960 na Merca, cu un prome muestra na Milwaukee Art Center na unda a cuminsa mustra su figuranan caracteristico.
Botero ta laga atras un obra artistico largo: desde su caracteristica y peculiar Mona Lisa, e parehanan di curpa diki bailando, pasando pa e esculturanan cu ta dorna e diferente luga rond di mundo, vooral su natal Medellin, na e cual el a regala un dozijn di obranan.
“Fernando Botero a muri, e pintor di nos tradicion y defecto, e pintor di nos virtud. E pintor di nos violencia y paz.” E presidente di Colombia Gustavo Petro a manifesta riba su rednan social unda a mustra un paloma cu ta na Cas di Nariño (sede presidencial) ken e artista a regala pa conmemora e acuerdo cu FARC na 2016.
