Artista Belinda de Veer ta presenta su exposicion titula “Fissures”

Museo Arqueologico Nacional Aruba (MANA) conhuntamente cu Prins Bernard Cultuurfonds Caribe ta presenta e exposicion di artista local Belinda de Veer. Den un conferencia di prensa Belinda a conta tocante su exposicion y kico tabata e inspiracion tras di e obranan di arte aki.

E titulo di exposicion ta “Fissures” cu ta significa rupturanan y Belinda ta conta cu e ta eigenlijk un ruptura cu por bin cu dolor, cu sorto di violencia y den e obranan aki e ta mas figurativo, “dus den bo sentimento bo a haya un ruptura pasobra bo a bay di un estado di inocencia, un estado mental pa un otro pa motibo cu bo a confronta cu cosnan dificil”, el a bisa.

E obranan di exposicion ta inspira pa un di e cosnan mas dificil cu un persona por confronta cune cu ta malesa, morto, morto di sernan keri y den un corto tempo esey a pasa den bida di Belinda y den e obranan aki e sentimento ey ta wordo expresa.

Belinda a conta cu e obranan sorprendente aki a wordo crea den e ultimo cuater aña, hopi di nan prome cu COVID, y pa casualidad e pandemia a yega na momento cu e tabata trahando ariba su arte y hopi hende actualmente ta wordo confronta cu e mesun sorto di tematica aki. “E ta manera un sorto di lanta for di soño di un realidad mas bunita, mas ros pa cosnan mas dificil”, Belinda a expresa.

E obranan aki tin hende lo por haya nan basta scur den su totalidad, pero e ta splica cu e ta su manera di purba expresa e sentimento di fisura cu por crece den un hende su bida.

Sr. Renwick Heronimo, Curator di MANA y di e exposicion di Belinda, a splica cu MANA ta haciendo un investigacion ya pa un aña caba pa un proyecto nobo, “Manteniendo Herencia Bibo den Tempo” cu MANA ta desaroyando cu sosten di UNOCA, caminda cu nan ta bay crea exposicionnan semi-permanente pa e proyecto aki.

El a conta cu hopi biaha experiencia ta laga rastronan atras. Den arqueologia por ehempel e ta laga ceramica atras, e ta laga pinturanan cu tin ariba piedra atras y tin hopi cosnan cu ta keda atras di diferente periodo. Di e periodo historico por bisa e monumento aki mes ta un refleho di e experiencianan di antepasado, den e caso specifico aki e famia Ecury.

Sr. Heronimo a sigui conta cu den tur e investigacion cu MANA tabata haciendo pa e proyecto, nan a bishita e studio di Belinda de Veer. “Ora cu nos a bishita e studio nos a realisa cu tabatin hopi tematica cu ta pas hopi bon cu e investigacion cu ta tumando luga pasobra bo ta papiando di antepasadonan, bo ta papiando di personanan cu no t’ey mas y bo ta papiando di nan experiencia den e cas aki”, el a indica.

El a splica cu mayoria di artista porta ta bisa cu e tematica di bida y morto ta un tematica cu nan no ta bay trata pasobra e ta uno fuerte, pero e obranan ta di tal magnitud y di tal profundidad ta un oportunidad pa cuminsa habri espacionan pa e tematica aki y manteniendo herencia, den e caso di Belinda un experiencia personal, bibo door di comparti esaki cu e publico y pa asina e publico por reflexiona y aprecia cada momento cu bida ta ofrece.

“E manera e cu Belinda den su obranan ta conecta tur su historia cu e ta bin cune di antepasadonan, historianan personal, y na momento cu el a transforma esey den obra di arte, nos a dicidi di invit’e pa expone den espacionan monumental akinan”, Sr. Heronimo a agrega.

Un otro aspecto, cu Heronimo a conta a hunga un rol hopi importante ta cu e aspecto di bida y morto actualmente ta un experiencia diario, pasobra mundo ta confrontando cu un pandemia caminda diariamente tin hende ta fayece y tin 5 miyon hende cu a fayece caba mundialmente door di e pandemia aki.

“Kiermen e no ta un cos asina personal. E exposicion aki den su totalidad, di un manera of otro e ta bira hopi actual. Esey tabata e ultimo aspecto cu a haciele e momento perfecto pa habri discusion aki, comparti un tematica cu por ta bo ta bisa ta un tiki pisa, pero mi ta kere no por ta mas actual cu na e momentonan aki”, el a expresa.